- Publika iha: 24 Agosto 2016
Igreja Katolika iha Timor –Leste hateten familia mak nudar eskola primeiru no prinsipal liu atu eduka no forma umanu sai ema diak iha sosiedade.
Padre (Pe) Juvito Rego, hateten familia iha papel importante tebes iha nasaun ida tanba familia mak escola primeiru ba labarik sira no inan-aman mak primeiru mestri ba labarik sira.
“Se inan-aman sira labele sai mestre umanidade ba labarik sira, konserteza labarik ne’e lahetan formasaun diak, hatene respeitu no hadomi malu,” nia koalia lia hirak ne’e bainhira partisipa iha konferensia imprensa movimentu kontra hahalok violensia bazeia ba jeneru iha salaun organizasaun Asistensial Legal ba Feto no Labarik (ALFeLa), Vila-Verde, Dili.
Alende ne’e nia mos preokupa ho situasaun familia ohin loron, ne’ebe familia barak naksobu no familia barak mos laiha formasaun ne’ebe adekuadu atu eduka oan sira ba dalan ne’ebe los.
“Familia tenke sai instituisaun ida atu kontrola oan sira, se la’e, susar oituan,” nia hateten.
Tanba tuir nia, atu hamenus numeru violensia iha rai laran, presiza supporta familia e familia iha papel importante atu kontribui.
Iha parte seluk, Vise Prezidente Rede Feto Timor-Leste, Alzira Reis konkorda katak familia mak sai xave importante ba redusaun violensia iha sosiedade, tanba ne’e presiza iha dame iha uma laran.
“Labarik balun tara aan tanba kauza husi violensia domestika ne’ebe akontese iha uma laran, hanesan foin dadaun liu ba ne’e,” nia hateten.
Nia dehan, iha mos kazu balun familia kompletu (inan-aman) maibe sira la halo funsaun ho didiak hanesan inan-aman, entaun fo mos impaktu ba oan sira.
Ho akontesementu hirak ne’e, nia dehan hanesan teste (challenge) ida ba organizasaun feto sira atu servisu maka’as liu tan halo advokasia ba familia no sosiedade hotu kona ba impaktu husi violensia ba familia, liu –liu ba labarik sira nia futuru.
Nia informa, numeru kazu violensia and violasaun seksual hasoru feto no labarik feto iha Timor –Leste as tebes ne’ebe kontribui ba iha kazu feto tara an, soe bebe.
