- Publika iha: 20 Junho 2016
Membru Parlamentu (MP), Deputadu Ancelmo da Conceicao, ejiji profesionalismu servisu husi tekniku Eletrisidade Demokratiku Timor-Leste (EDTL), liu-liu bainhira hadia sirkuitu ruma.
Tanba tuir nia, wainhira mosu sirkuitu ruma antendementu husi tekniku EDTL tarde liu no dala ruma la halo atendementu liu.
“Ita haree komunidade suku Fatubesi kuaze fulan rua ona, la asesu ba eletrisidade, tanba mosu sirkuitu e to’o agora seiduak hadia,” nia hateten.
Nia dehan, kestaun ne’e komunidade Fatubesi hato’o ona ba iha dirasaun EDTL munisipiu Ermera nia, maibe to’o agora la resposta.
Kazu hanesan, nia hateten, akontese mos iha postu administrativu Hatulia, komunidade balun la asesu ona ba eletrisidade, tanba fiu kotu.
Tuir nia, lolos situasaun ne’e labele akontese tanba komunidade iha direitu proprio atu hetan atendementu ne’ebe fasil no lais husi autoridade responsabel sira.
“Ahi ne’e nesesidade baziku komunidade nian, sira tenke asesu ba ahi tanba ne’e ne’e sira nia direitu,” nia dehan.
Hatan ba kestaun ne’e, Vise Ministru Obras Publiku, Transportes e Komunikasaun (MOPTK), Januario da Costa Pereira, rekonese katak fatin balun iha duni sirkuito maibe governu sei esforsu hodi hadia.
“Ita sei haree oinsa mak bele hadia,” nia hateten.
Iha parte seluk komunidade Maria Carvalho, hateten atendementu iha sidade Dili lais, maibe area rurais mais deifisil bainhira mosu sirkuito ruma.
“Espera iha foho mos sira halo hanesan ne’e,” nia espera.
