Implementa To’os Eskola, MAP-ME Hahu Identifika Eskola Sira

Ministeriu Agrikultura e Peskas hamutuk ho Ministeriu Edukasaun hahu identifika eskola balun iha distritus atu implementa projetu to’os eskola nian, ne’ebe sei kontribui ba iha programa merenda eskolar nian.

Ministru Mariano Asanami Sabino, hateten programa ida ne’e tama iha planu estrategiku halakon hamlaha ne’ebe lansa direitamente husi Primeiru Ministru Xanana Gusmão no Princesa Thailandia iha Parlamentu Nasional fulan hirak liu ba. 

“Agora dadaun ita identifika no orienta ona iha eskola balun, ita tama no husu sira atu loke dalan, tanba ami fornese fini no asistensia ba kuda, hakiak, kuidadu to’o bo’ot,” Ministru Asanami hateten, iha Parlamentu Nasional.

“Restu ne’e profesores no alunus sira mak servisu iha to’os eskola ne’e,”.

Nia hateten, Ministeriu Agrikultura no Peskas (MAP) sei fornese fini ikan, marungi no modo sira seluk ba eskola sira ne’ebe identifika ona.

Tanba ne’e, nia dehan, linha koordenasaun entre linha ministerial ne’e importante tebes, “buat hotu ita bele halo, maibe eskola sira ba sosa fali modo hanesan ikan lata iha loja, ne’e problema,”. 

Niaafirma, kada distritu ida sei identifika eskola tolu, hanesan projetu pilotu tanba iha fatin balun eskola sira hateten laiha rai atu implementa. 

Entretantu Membru Komisaun F (saude, edukasaun, kultura, veteranus no igualdade jeneru), Deputada Ilda Maria da Conçeicão, konsidera ida ne’e pasu positive tebes hodi kontribui ba iha programa merenda eskolar no asegura sustentabilidade aihan no nutrisaun ba labarik sira. 

Nia dehan, programa hanesan bele aplika mos ba iha grupo sira iha sukus atu kuda modo no hakiak animal. “Depois submete ba iha eskola sira, duke profesores sira ba sosa fali ikan lata iha loja,” nia hateten. 

Iha parte seluk, Diretora Hamutuk Ita Ajuda Malu (HIAM) Health, Rosaria Martins da Cruz, fo agradese tanba governu realize ona nia mehi no husu atu programa ne’e kontinua iha futuru. 

“Ida ne’e mak hau nia mehi uluk kedas, atu eduka no fo konese ita nia labarik sira husi ki’ik kona ba aihoris sira ne’ebe iha valor nutrisaun diak liu ba sira nia isin,” Diretora HIAM Health ne’e esperansa.