- Publika iha: 22 Setembro 2014
Tribunal Distrital Dili fo pena admoestasaun ba arguido TC ne’ebe involve krimi violensia domestika.
Kazu ne’e rasik akontese iha dia 5 Junu 2013. Tuir akuzasaun Ministeriu Publiku iha tribunal, katak tuku 7:00 kalan arguido husu ba LC (lezada) labele kaer telefone ona, tanba arguido deskonfia lezada selingkuh hela.
Maibe iha altura ne’eba lezada lakohi atu tuir saida mak arguido hatete, nune’e arguido foti kadeira masa hodi tuda ba lezada nia kotuk laran.
Hafoin le’e hotu akuzasaun husi Ministeriu Publiku (MP), Juis Prezidente Duarte Tilman, husu ba arguido TC hakarak atu kolia ou nonok, maibe iha altura ne’ebe arguido deside atu koalia.
Entretantu arguido TC, rekonese katak nia parte baku duni lezada, tanba koalia la fiar.
“Hau la gosta nia kaer telefone, tanba wainhira nia telefone ona nia kolega koalia la para rai,” arguido TC deklara.
Enkuantu lezada LC deklara iha TDD, katak nia kontra tanba arguido hakarak fa’an telefone ne’e.
“Telefone ne’e hau nia ama bo’ot mak fo mai hau,” lezada LC deklara.
Maske nune’e, nia dehan, hafoin problema ne’e, dadaun ne’e sira nain rua diak malu no hela hamutuk no arguido la halo ona aktu violensia ba lezada.
Nune’e Ministériu Públiku akuza arguidu kontra artigu 145 Kódigo Penál kona-ba ofensas ba integridade fízika simples konjuga ho artigu 2, 3 no 35 alinea (b), Lei Kontra Violénsia Doméstika.
Enkuantu arguido hetan defeza husi defensor publiku advogadu Leonidio Marques ho Juvinal Yanes Freitas Defensór Estajiadu.
