- Publika iha: 01 Outubro 2015
Membru Parlamentu Nasional, deputado Virgilio da Costa Hornai, ejiji ba Sekretario Estado Mulher (SEM) atu loke prosesu investigasaun (klean) ba ezekusaun osan transferensia publika ne’ebe apoia ba grupo feto, tanba grupo barak mak la eziste.
Nia dehan, tenke ejiji responsabilidade grupos ne’ebe hetan osan, maibe la halo atividade tanba konsidera ne’e osan estado nian.
“SEM iha responsabilidade bo’ot atu halo investigasaun, grupo sira ne’e uza duni osan ne’e tuir regras ne’ebe iha ga la’e, tanba ita lakohi ema hotu hanoin osan estado fasil hetan,” Deputado Hornai sujere, iha Parlamentu Nasional.
Prezidente Komisaun F (saude, edukasaun, igaulidade, veteranus) ne’e, hateten orsamentu ida ne’e parlamentu aprova kada tinan ho objetivu atu apoia grupo feto sira hala’o negosio hodi sustenta sira nia familia no komunidades.
“Maibe realidade grupo barak mak hetan tiha osan lahalo atividades,” nia kestiona.
Iha parte seluk, Diretora Ezekutivu organizasaun Fundasaun Alola, Alzira Reis, apoia katak tenke halo duni investigasaun, tanba osan estado nian.
“Atu ita hatene osan ne’e ba ne’ebe, tanba osan bo’ot tenke iha responsabilidade,” nia hateten.
Nia hatutan, ho problema ida ne’e fo hanoin mos ba instituisaun estado ne’ebe hakarak fo apoiu ba iha grupos, tenke konese didiak grupo alvu sira ne’ebe atu hetan apoiu, tanba iha grupo barak mak hetan osan sira fahe malu osan no la halo atividade.
Entretantu bainhira Jornalista The Dili Weekly (TDW) tenta konfirma asuntu ne’e ba iha Diretora Jeral Sekratrio Estado Mulher (SME), maibe la konsege tanba okupadu.
