- Publika iha: 23 Abril 2013
Membru Parlamentu Nasional kestiona maka’as publisidade kona ba sigaru nian ne’ebe tau iha fatin publiku tanba fo impaktu la diak ba populasaun liu-liu joventude sira nia saude.
Deputada Josefa Alvares Soares, dehan Timor –Leste nudar nasaun foun ne’ebe ho populasaun ne’ebe ki’ik bainhira governu la fo atensaun ba problema sira hanesan ne’e (publisidade) bele fo ameasas bo’ot ba rekursu humanu Timor –Leste nian tanba agora dadaun tuir grafiku moras nian TL iha numeru as ba moras TB, tensaun inklui mos kankru.
“Tenke tau publisidade ida ne’ebe mak merese no governu aseita atu tau iha fatin publiku,”dehan Deputada Josefa Alvares Soares, (11/04), iha Parlamentu Nasional.
Iha Konstituisaun Republika Demokratika de Timor-Leste, artigu 53 alina 2 hatur ona katakKonstituisaun da Republika alina 2 hatuur ona katak lei maka regula publisidade, bandu publisidade hirak ne’ebe buka taka, hasees no habosok.
Tanba ne’e Deputada ne’e husu ba governu atu tau matan ba kestaun ne’e, tanba agora kompania balun tau publisidade kona ba sigaru foun 23 ne’ebe tau iha dalan publiku sira. “Ita hatene katak sigaru ne’e fo impaktu la diak ba ema nia saude,” preokupa Deputada Soares.
Nia hatutan, iha primeira legislasaun kedas kestaun ne’e sai ona preokupasaun Deputadu sira no sira fo ona rekomendasaun ba governu atu kria regulamentu ida bainhira publisidade sigaru LA (iha momentu ne’eba) komesa mosu iha fatin publiku maibe laiha rezultadu e pior liu governu mak fasilita fali publisidade sira ne’e.
Iha parte seluk, Reprezentante Organizasaun Saude Mundial (WHO) iha Timor –Leste , Doutor Jorge Mario Luna sente hakfodak no triste bainhira hare publisidade sigaru foun ho naran Vinte Tres (23) mosu iha fatin publiku.
tanba Timor-Leste asina ona konvensaun internasional kontrola tabaco.
“Hau sente triste, tanba Timor-Leste asina ona konvensaun internasional kontrola tabaco,maibe kontinua tau publisidade sigaru iha fatin publiku sira,” preokupa Doutor Luna.
Nia sujere, Governu Timor-Leste tenke bandu publisidade sira kona ba tabaco, nune’e bele proteje Timor oan sira nia saude.
Doutor Luna konsidera, estadu Timor-Leste laiha seriadade atu implementa konvensaun internasional kontrola tabaco tanba laiha regulamentu ida atu regula publisidade sira ne’e no bandu fuma iha fatin publiku.
