- Publika iha: 18 Setembro 2014
Membru Parlamentu Nasional kestiona kona ba aktividades Miss Turismu ne’ebe durante ne’e vacuum no laiha kontinusaun programa hafoin eleitu sai miss.
Membru Komisaun D (ekonomia e dezenvolvementu), Deputada Brigida Antonia Correia, hateten orsamentu lubuk ida mak gasta ba realize programa ida ne’e, maibe la fo benefisio ba povu.
“Miss Turismu besik tinan ida ona maibe to’o agora laiha kontinuidade programa,” Deputada Correia kestiona, iha Parlamentu Nasional.
Maioria programa husi Ministeriu Turismu nian, nia dehan, gasta deit osan povu nian maibe la fo benefisio ba povu no ba nasaun.
“Iha orsamentu jeral do estadu 2015 nian, Parlamentu Nasional sei minimize programa balun hanesan karnaval,” Deputada Correia hateten.
Iha parte seluk, Diretora Interina Rede Feto Timor –Leste, Filomena Fuca, hateten programa ida ne’e sai preokupasaun ema hotu nian, tanba la halo sosializasaun antes implementa.
“Komunidade barak mak la hatene papel lolos Miss Turismu nian iha komunidade sira nia leet,” nia dehan.
Nia rekonese, katak programa ne’e presiza duni, maibe la’os agora no seidauk bele responde ba feto nia nesesidade oras ne’e dadaun, feto barak sei moris iha mukit, susar asesu ba fasilidade saude, hetan violensia oioin.
“Devia osan sira ne’e uja hodi hadia fatin turismu sira hodi hetan rendimentu no minimize ema ba pasa ferias iha rai liur, investe fali ba programa Miss Turismu ne’ebe la fo benefisiu ba povu,” nia kestiona.
Entretantu, bainhira Jornalista TDW tenta halo konfirmasaun ba iha Diretur Nasional Rekursu Humanu Ministerio Turismu, Aderito Babo Soares lakohi atende jornalista ho rajaun okupadu.
