- Publika iha: 02 Dezembro 2015
Diretor Nasional Servisu de Agua (DNSA), Gustavo da Cruz, hateten agora dadaun uma kain hamutuk rihun rua (2000) iha munisipio Dili mak selu ona tarifa ba bee moos, tanba asesu ona bee durante 24 oras nia laran.
Nia dehan, uma kain ne’ebe selu ona tarifa mai husi Suku Comoro, Fatuhada, Bairo-Pitte, Kampo Alor, Bemori, Becora no Mascarenhas.
“Agora dadaun ita iha kuaze uma kain dois mil e tal mak selu ona bee moos,” Diretor da Cruz hateten, iha Hotel Timor, Dili.
Kona ba tarifa ba bee moos ne’e, nia dehan, depende ba uzus tanba kada metru kubiku sei selu 20 sentavus ne’e ba komunidade baibain, maibe ba komersial sira kada metru kubiku selu 60 sentavus.
Diretor ne’e mos rejeita informasaun husi komunidades kona ba selu bee moos, maibe bee la mai iha sira nia fatin, tanba tuir nia metru kontador ne’ebe instala ne’e so kona bee mak halai, kuandu bee laiha ponteiru kontador la halai.
Iha parte seluk komunidade Gaspar da Silva, hateten nudar sidadaun sira pontu atu kontribui ba prosesu dezenvolvementu, liu –liu selu tarifa bee moos no eletrisidade, maibe nia preokupa tanba um a kain balun seidauk monta kontador no asesu ba bee moos gratuita.
“Hau lamenta, tanba governu tau kontador ba uma kain balun deit selu tarifa ba bee moos, e barak liu mak laiha kontador no uza bee estraga deit hodi rega rai, fase kareta no seluk tan,” nia lamenta.
Nia mos, husu ba parte kompetente atu kontrola komunidades no fo sansaun ba ema individu sira ne’ebe viola lei liu –liu halo ligasaun illegal no uza bee estraga, tanba impende fali ema seluk nia direitu atu asesu ba bee moos.
Entretantu Membru Parlamentu Nasional, Deputada Ana Ribeiro, hateten kestaun bee moos ne’e problema ne’ebe sira koalia beibeik iha plenaria, maibe governu nunka atu konsidera atu rezolve.
“Problema bee mos la’os deit iha area rural iha capital Dili laran liu –liu suku Farol tinan ida ona komunidade sira la asesu ba bee moos,” nia hateten.
