- Publika iha: 09 Fevereiro 2015
Reprezentante labarik konsidera Ministerio Solidaridade Sosial (MSS) failha kontrola implementasaun programa Bolsa da mae iha baze, tanba funsionario publiku nia oan mos simu subsidio ne’e.
Ivonia Martins, husu ba ministerio solidaridade social atu kontrola implementasaun programa ne’e tanba programa ne’e la benefisia labarik kibi’it laek sira maibe labarik sira ne’ebe iha ona kondisaun.
“Ami husu esplikasaun klaru kona ba politika bolsa de mae tanba iha distritus funsionario publiku nia oan sira mos simu hotu subsidio ne’e,” Dehan Martins iha diskusaun publiku entre labarik ho membru governu ne’ebe organiza husi Komisaun Nasional Direitu Labarik, iha salaun MSS Dili.
Nia mos husu atu update database ne’ebe iha tanba estudantes balun la tama ona eskola, maibe kontinua simu subsidio ne’e nafatin.
Hatan ba kestaun ne’e, Ministra Solidaridade Sosial, Isabel Amaral Guterres, katak ema ne’ebe iha direitu hetan bolsa de mae mak labarik vulneravel sira ne’ebe ativu eskola.
Nia haktuir, funsionario publiku nia oan mos bele simu subsidio ne’e bainhira oan barak salario ne’ebe iha la sufsente atu supporta oan sira hotu.
Nia hatutan, programa ida ne’e responsabilidade MSS, maibe atu garantia implementasaun la monu sala ba alvu ema hotu iha obrigasaun atu kontrola hamutuk hodi garantia osan ne’e to’o duni ba labarik sira ne’ebe presiza, tanba ne’e osan estado nian.
“Ema hotu-hotu tenke kontribui atu kontrolu se haree ema ida la merese atu hetan bolsa de mae mai hateten ba pesoal MSS atu buka tuir,” dehan Ministra Isabel.
Nia hatutan, kriteria ba benefisiario sira mak oan kiak, inan aman iha maibe oan barak ekonomia uma laran, fraku maibe labarik sira ne’e tenke eskola, se la eskola laiha direitu atu hetan subsidio ne’e.
