- Publika iha: 19 Dezembro 2014
Membru Parlamentu Nasional kestiona komunidade suku Cova, sub-distritu Balibo, distritu Bobonaro desde ukun an to’o agora seidauk assesu ba eletrisidade.
Deputadu Manuel Gaspar Soares da Silva, hateten komunidade iha suku refere lamentavel, tanba iha suku balun hetan ona ahi, maibe sira nia suku seidauk.
“Ne’e oinsa mak ne’e, iha suku balun hetan ona maibe suku balun seidauk,” Deputadu da Silva levanta iha plenaria Parlamentu Nasional.
Durante ne’e komunidade iha suku refere uja deit ahi tradisional durante tinan barak ona, tanba ne’ e nia husu ba governu atu ba halo verifikasaun no monta ahi iha suku Cova.
“Situasaun ne’e grave tebes,” nia dehan.
Iha fatin hanesan Membru Komisaun E (infra-estrutura, transporte e komunikasaun), Deputadu Inacio Moreira, hateten kestaun ahi ne’e la’os deit iha area remotas, maibe iha sidade mos kestiona.
“Dili laran mos mate lakan, ita haree iha area remotas sira ne’e kuaze ahi seidauk tama hotu,” Deputadu Moreira hateten.
Hatan ba kestaun ne’e Sekretariu Estadu ba Eletrisidade (SEE), Januario Pereira, hateten agora dadaun governu sei esforsu hela hodi monta iha suku-suku, aldeias no bairu-bairu, ne’ebe dala ruma han tempu kleur.
“Buat ne’e prosesu, maibe sertu ke komunidade sira sei hetan hotu ahi,” SE Pereira hateten.
Durante ne’e, nia dehan, tekniku sira tun ba baze hodi halo verifikasaun de dadus kona ba iha parte ne’ebe mak ahi seidauk tama, nune’e mos xefe suku sira kada suku hatama mos sira nia proposta, e agora esforsu hela hodi monta ahi sira ne’e.
“Ita halo neneik-neneik.”