- Publika iha: 11 Novembro 2015
Membru Parlamentu (MP) Nasional, Deputadu Francisco Branco, husu ba Ministeriu Edukasaun (ME) atu halo avaliasaun ba diploma sira husi rai hotu-hotu ne’ebe timor oan sira hasai estudu ba, tanba iha universidade balun fa’an no oferese diploma falsu ba maestradu no dotoramentu nian.
Hanesan iha Indonezia, nia dehan, universidade balun fo diploma falsu ba lisensiatura sira, tanba ne’e husu ba Ministeriu Edukasaun atu halo avaliasaun ba diploma sira ne’e.
“Ita tenke haree fila fali ita nia dotoramentu, ita nia maestradu sira ne’ebe mak ba eskola iha Indonezia nia diploma,” Branco sujere, iha Parlamentu Nasional.
Se la’e, nia dehan, sei hamosu duvida kona ba kapasidade no nivel konesementu maestradu, dotoramentu no lisensiatura sira.
“Se la’e ema duvida hotu ita nia formadu sira ne’e,” nia hateten.
Hatan ba kestaun ne’e Diretor Jeral Servisu Kooperativus ME, Antoninho Pires, katak iha orientador balun mak sei haree kona ba kestaun ne’e.
“Ita haree universidade ne’e ho akreditasaun saida, A, B ou C inklui mos haree kona ba diploma ne’e rasik, tanba iha kode balun mak la hanesan, kode ba ijasah palsu no asli ne’e la hanesan,” Pires hateten.
Nia esplika, hanesan foti maestradu entaun tinan rua, dotoramentu minimu tinan tolu, lisensiatura depende minimu tinan 4 no tinan lima no neen, mais kuandu iha estudante balun tama eskola iha tinan 2012 no hetan kedas diploma iha 2013, ne’e tenke hetan investiga.
