- Publika iha: 24 Agosto 2016
Sentru formasaun vokasional hamutuk 16 mak hetan apoiu fundus husi Sekretariadu Estado Politika Formasaun Profesional Empregu (SEPFOPE) atu kapasita foinsa’e sira iha area oi-oin.
Diretor Jeral SEPFOPE, Jacinto Barros, hateten orsamentu SEPFOPE nian ba tinan 2016 ne’e ho montante $371,846.00 husi Fundu Dezenvolvimentu Capital Humanu (FDCH) hodi apoia ba sentru formasaun 16 iha munisipios balun.
Tanba nia konsidera, sentru iha papel importante tebes hodi prepara foinsa’e sira ba kampu servisu.
“Uza osan ho responsabilidade no favor ida relatorio tenke hatama tuir loron ne’ebe determina ona,” nia sujere, iha serimonia asina akordu entre SEPFOPE ho Sentru formasaun sira iha salaun SEPFOPE Kaikoli, Dili.
Nia dehan, sentru sei forma foinsa’e sira iha area espesifiku sira hanesan ospitalidade, administrasaun, agrikultura, carpintaria, kustura, pekuaria, hortikultura, automotif no lingua Ingles.
Nia rekonese katak empregador sira sei kestiona kona ba kapasidade no abilidade trabalhador Timor oan sira nian, e governu kontinua apoia sentru formasaun sira hodi forma trabalhador ne’ebe kualidade no responsabilidade.
Iha tinan 2016 ne’e iha proposta 200 mak tama iha gabinete SEPFOPE nian, maibe nia dehan bazeia ba rezultado avaliasaun proposta 16 mak merese hetan apoi tanba sira iha performance ne’ebe diak.
Iha parte seluk, reprezentante husi FDCH, Arsenia Madeira hateten governu iha obrigasaun atu reforsa sentru formasaun nasional sira hodi kapasita foinsa’e sira.
“Exemplu ; ita fo orsamentu maka’as tebes ba sentru formasaun lingua Korea nian ne’ebe ami toma nota, katak ita tenke reforsa ita nia sentru ne’ebe iha ita nia rai rasik,” nia hateten.
Alende ne’e, nia mos apela ba diretor sentru sira atu uza orsamentu ne’e ho responsabilidade no tenke ezekuta iha tinan ida ne’e nia laran.
Entretantu Diretor Sentru Treinamentu Vokasional Joventude Comoro, Norberto da Costa, agradese ba governu (SEPFOPE) ne’ebe nafatin fo apoiu ba sira hodi fo formasaun ba foinsa’e sira iha rai laran.
“Ami nia formasaun espesifiku ba iha costumer and sales force no sertifikadu level IV ba formadores,” nia hateten.
Nia dehan, objetivu husi formasaun ida ne’e atu dezenvolve rekursu humanus ne’ebe iha abilidade no kapasidade atu bele kria negosio ba aan rasik.
Nia hatutan, sentru STVJ Comoro fo ona formasaun ba foinsa’e lubuk ida iha area oi-oin no graduadu sira barak mak hetan ona servisu iha instituisaun governu, non governmental inklui agensia sira.