- Publika iha: 24 Junho 2016
Sekretariadu Estado Apoiu Sosio Ekonomia Feto (SEM) re-estabelese hikas Grupo Trabalho Jeneru (GTJ) iha linha ministerios no sekretario estado sira ne’ebe hetan ona re-estruturasaun.
Diretor Nasional Politika Dezenvolvimentu Jeneru (DNPDJ), Henrique da Silva, hateten GTJ nia papel importante tebes atu halo advokasia ba politiku sira hodi integra asuntu jeneru iha planu asaun ministerio nian.
“Sira nia papel atu asegura asuntu jeneru liu –liu politika abordagen integradu jeneru la’o duni iha sira nia ministerio,” nia hateten iha servisu fatin, Kaikoli Dili.
Iha ministerio balun (minsiterio saude, ministerio agrikultura e peskas, ministerio justisa no seluk tan), nia hateten, GTJ la eziste ona tanba kauza husi re-estruturasaun ne’ebe akontese iha ministerio laran.
Nia informa, GTJ la’os deit estabelese iha nivel nasional maibe iha mos nivel munisipios, grupo ne’e iha hodi asegura implementasaun politika abordagen integradu jeneru iha nivel local.
Grupo Trabalho Jeneru estabelese iha V governu konstitusional, bazeia ba rezolusaun governu no 27/2011 hodi implementa politika jeneru iha Timor –Leste.
Entretantu Prezidente GTJ iha Sekretario Estado Politika Formasaun Profesional e Empregu (SEPFOPE), Jacinto Barros Gusmão, hateten sira halo analiza ba planu orsamentu ne’ebe iha hodi garantia programa hotu ne’ebe implementa fo duni benefisio ba feto no mane.
“Ami haree liu ba planu orsamentu no programa ne’ebe iha SEPFOPE tenke iha balansu jeneru,” nia hateten.
Nia informa, programa ne’e implementa liu –liu formasaun kapasitasaun iha balansu duni entre feto no mane.