- Publika iha: 09 Dezembro 2013
Prezidente Republika Taur Matan Ruak, hateten Masakre Craras nia signifikadu bo’ot ba historia Timor-Leste nian, tanba iha fatin ne’e mak kilat hahu tarutu hodi loke dalan ba fatin seluk-seluk atu tarutu tuir hodi hakilar, katak funu sei iha nafatin.
Preizdente Taur Matan Ruak (TMR), dehan povu hatur nia determinasaun no okaziaun oi-oin iha terus laran tomak, iha Dili tinan 1980 no Ainaro iha 1982.
“Ita fo homenajen ba Timor oan sira hotu ne’ebe fo nia vida ba ita nia nasaun nia soberania, fo sira nia an ba mate,” Prezidente TMR hateten, iha komemorasaun loron 28 novembru 2013, iha Craras, distritu Viqueque.
Nia konta, depois akontese iha Craras, mosu mos revolta iha Craras, Lospalos, Baucau no fatin sira seluk iha Timor laran tomak.
TMR dehan, maske as’wain sira mate ona, maibe povu Timor nafatin tuba rai metin hodi funu to’o remata, tanba povu nia determinasaun mak nafatin lutu hodi alkansa vitoria ba ukun rasik an.
“Nasaun mos fo homenajen ba feto faluk no oan kiak sira ne’ebe simu sakrifisiu oi-oin hodi defende independensia no liberdade ba ita nia nasaun no ba ita nia rai,” Prezidente TMR dehan.
Nia dehan, proklamasaun independensia 28 Novembru 1975, fo sai lian no razaun baTimor oan sira nian atu halo funu hodi manan funu.
“Ita tenke hametin nafatin hodi alkansa vitoria foun ba moris diak no hakmatek,tenke estabilidade, badinas, servisu maka’as hadia ita rai, nune’e garante moris diak ba Timor oan sira hotu,” TMR hateten.
Iha fatin hanesan Rainato da Costa Amaral, vitima ba akontesementu Craras, haktuir katak, iha momentu ne’eba militar Indonezia kaer nia ba postu Kodim no lori sira ba fakar .
“Iha momentu ne’eba ami iha nain 18 atu lori ba fakar, maibe bainhira hau rona sofer ho hansip koalia dehan atu kesi hotu ami iha kareta leten, entaun hau tuda an sai husi kareta kidun ba tur hamutuk ho populasaun sira,” nia konta.
Nia konta, maluk sira seluk la konsege tun, bapa sira kesi sira ho tali, depois lori ba oho iha Wetutukuru.
