- Publika iha: 09 Fevereiro 2015
Ai-sampolo marka ho ‘X’ ne’ebe governu planu atu tesi iha Banku Central Timor-Leste (BCTL) nia oin, nune’e bele haluan tan estrada, husi parte rede HASATIL no komunidade rezidente iha kapital Dili la konkorda ho desizaun ida ne’e.
Kordenador Sekretariado Rede HASATIL, Gil Horacio Boavida, husu ba governu tenke fo justifikasaun klaru kona ba rajaun tesi ai sira iha sidade laran ne’e.
“Sidade furak la’os nahe deit tanba semente hotu, maibe tan natureza matak, tanba ne’e ami la konkorda kuandu governu tesi sira ne’e, se sira tesi ami sei mobiliza komunidade halo asaun kontra,” Koordenador HASATIL, Boavida hateten, iha salaun Joao Paulo II, Comoro,Dili.
Tanba tuir nia, inundasaun bo’ot sei mosu iha Dili laran, se governu tesi hotu ai sira iha sidade laran.
Iha parte seluk Prezidente Komisaun D (ekonomia e dezenvolvementu), Deputada Jacinta Abu Cau Pereira, hateten presiza halo estudu antes tesi ai sira ne’e, tanba ai sira ne’e iha istoria mos.
“Ne’ebe ami ladun konkorda, tanba ai sira ne’e mos hanesan istoria ida ne’ebe presiza konserva, se bele aparu deit diak liu,” Deputada Pereira sujere.
Entretantu Diretor Jeral Sekretariado Estado Meu Ambiente (SEMA), João Carlos, hateten tuir informasaun ne’ebe SEMA simu husi Ministeriu Administrasaun Estatal (MAE), katak ai sira ne’e sei tesi duni hodi loke luan estrada iha diresaun Acait oin.
Tanba ne’e, nia dehan, SEMA haruka ona karta ba iha MAE atu hare asuntu ida ne’e no halo jestaun ne’ebe diak atu labele estraga aihori sira ne’ebe iha ona.
“Ita presiza sobu ai sira ne’e duni, maibe tenke iha jestaun ne’ebe diak, nune’e labele estraga fali buat ne’ebe ita hakiak ona iha tempu naruk,” Diretor Carlos hateten.
Entretantu bainhria jornalista TDW koko konfirma asuntu ne’e ba iha Administrador Distritu Dili Gaspar Soares, maibe la konsege tanba administrador okupadu.
