- Publika iha: 12 Setembro 2015
Vise Diretor Fundasaun Mahein (FM), Joao Almeida Fernandes, husu ba komando Polisia Nasional Timor –Leste (PNTL) atu monta postu Ofisiais Polisia Suku (OPS) iha teritoriu, nune’e bele fasilita servisu ofisiais sira iha baze.
Tanba dalaruma problema ruma akontese iha suku laran, nia dehan, atendementu OPS nian tarde liu, tanba sira la hela iha sukus ne’ebe komando koloka ba.
“OPS sira koloka ona iha suku, maibe hela fatin ba sira laiha oinsa mak sira bele servisu ho diak,” Vise Diretor FM Fernandes hateten, iha Dili.
Alende ne’e, nia dehan, iha mos difikuldade seluk; OPS sira mos susar atu komunika ba autoridade local sira tanba pulsa ba komunikasaun laiha.
“Komunikasaun laiha, kombustivel mos talves laiha tan,” nia hateten.
Tanba ne’e FM husu ba komando atu hadia difikuldade hirak ne’e, atu nune’e bele suporta servisu OPS sira iha suku laran.
Hatan ba preokupasaun ne’e II Komandante Polisia Komunitaria, Helena Das Dores, rekonese kestaun ne’e, maibe agora dadaun komando trasa ona planu atu estabelese postu ba OPS sira iha suku laran.
“Komando sei fo importansia ba asuntu sira hanesan ne’e, atu oinsa haforsa servisu polisiamentu komunitaria,” Das Dores hateten, iha Kaikoli, Dili.
Kona ba kombustivel no pulsa ba komunikasaun, nia dehan, presiza tempu no orsamentu sufsiente atu hadia kestaun hirak ne’e.
“Maibe Neneik- neneik ami sei kompleta,” nia hateten.