- Publika iha: 26 Agosto 2011
Kazu Valdimir Lebre Coreia alias Kuka ne’ebe mate iha Delta Nova iha 28 Dezembru 2009 ne’ebe diskunfia tiru husi element Polisia husi estasaun Comoro, sei halo julgamentu iha fulan Augusto iha Tribunal Distrital Dili (TDD).
“Kazu Kuka agora nia prosesu iha Tribunal Distrital Dili sira estuda para marka loron para atu halo julgamentu nian, soke loron mak seidauk hatene los.
Kuando Tribunal marka ona loron julgamentu husi familia sei hetan notifikasaun ba asiste julgamentu ida ne’e,” informa Julio Lebre Coreia, nudar aman husi matebian Valdimir Lebre Coreia (Kuka) semana kotuk iha nia knar fatin Radio Timor-leste (RTL),Kaikoli Dili.
Tuir nia, kazu ne’e rasik Ministeriu Publiku (MP) halo ona ninia akuzasaun no prokurador jeral haruk a ona ba ha tribunal iha Fevereiru 2011.
Julio hatutan, bainihra to’o loron mak la halo julgamentu, mak parte familia sei ejiji nafatin ba MP to’o kazu ne’e julga iha Tribunal.
Parte familia lamenta tanba maske atu tama tinan 2 ona maibe seidauk hetan nia finalidade.
“Ami hare kazu ne’e hanesan intervensaun politik ida ba ami e konserteza kazu ida ne’e sei la la’o tanba tuir ami nia hare hanesan iha intervensaun barak ne’ebe iha laran e konserteza iha iha pihak pihak ne’ebe terlibat iha kazu ne’e nia laran e ami mos sei la nonok tanba kazu ne’e akontese dala barak ona ba joventude Timor oan sira sai vitima ba bei-beik husi ema ne’ebe la hatene tuir nia knar no kodigo disiplina polisia ninian ne’ebe halo hahalok ne’ebe la los,nia lamenta.
Entertantu tuir joventude nomos kolega husi matebian Kuka ne’ebe lakohi publika nia naran hateten maske demora maibe tenke prosesa kazu ne’e to’o nia finalidade tanba ne’e kazu homisidu.
“Hau lakohi para joven sira sai nafatin vitima husi polisia sira, se kuandu kazu ida ne’e mak sei la rezolve nafatin sira sei halo joventude sira hanesan atan ba polisia sira,” nia hateten.
Alende ne’e, Joao Almeida nudar Peskizador Fundasaun Mahein (FM) kazu hirak ne’ebe involve iha membru Polisia Nasional Timor-Leste ( PNTL ) inklui kazu Valdimir Lebre oras ne’e sei iha prosesu investigasaun nia laran.
“Aktus violentu no aktus indisiplinar ne’ebe elementus PNTL komete laiha prosesu ne’ebe klaru , kontinua iha prosesu investigasaun nia laran no laiha justisa ba elementus ne’ebe komete iha aktus hirak ne’e ,” nia dehan.
FM konsidera prosesu disiplinar ba aktus displinarios seidauk forte atu kesi asaun hirak ne’e nune’e mos la iha prosesu ne’ebe atu justifika lolos kazu disiplinar iha prosesu normal tuir lei ne ‘ebe vigora.
Entretantu bainhira jornalista tenta atu konfirma asuntu ne’e ba iha Advogadu ne’ebe kaer kazu ne’e, Adelino Perreira maibe lakonsege tanba okupadu.
