- Publika iha: 06 Janeiro 2016
Sekretariu Estadu Terras e Proriadade (SETP), Jaime Xavier Lopes, hateten iha 2015 sira konsege hatama reseitas ba kofre estadu hamutuk $2,433,563 mill.
Nia hateten, total orsamentu ne’e ($2,433,563 mill) ne’e SETP rekolha hahu husi fulan Janeiru to’o Outubru e to’o Dezembru sei atinji 3 milioens resin.
“Reseitas hirak ne’e ami rekolha husi sira ne’ebe mak halo negosiu, eskritoriu ba misaun diplomatiku sira, hanesan embaixadasira,” SE Lopes hateten, iha Dili.
Nia hateten, iha tinan kotuk (2014) SETP konsege hatama reseitas ba estadu hamutuk $3 milioens resin e kada tinan sempre hatama reseitas ba estadu.
Iha parte seluk Deputadu Virgilio Hornai, apresia ho servisu SETP ne’ebe kada tinan sempre hatama reseita ba estadu hodi dezenvolve konstruksaun rai ida ne’e nian.
“Ne’e diak, tanba estadu bele uza osan sira ne’e hodi dezenvolve rai ne’e,” Hornai hateten.
Maibe, nia dehan, kobransa ida ne’e tenke halo ho masimu, sekuandu halo kobransa ba fatin negosiu sira entaun tenke to’o iha baze, labele iha deit nivel nasional.
Iha fatin seluk komunidade Joao Fernandes, hateten reseitas ne’ebe governu rekolha no hatama ba estadu ne’e, lolos governu tenke aprezenta mos iha publiku, atu nune’e komunidade bele hatene kona ba reseitas hira mak kada tinan Timor iha.
“Povu mos iha direitu atu hatene kona ba ida ne’e,” Fernandes hateten.
