- Publika iha: 10 Novembro 2015
Deputy Program Manager organizasaun Marie Stopes Internasional Timor-Leste (MSITL), Juliao da Silva, hateten durante fulan hitu (Janeiru-Julho) nia laran iha ona inan nain 12.000 resin mak hetan atendimentu Planeamentu Familiar (PF).
Nia dehan, PF la’os limita oan maibe fo espasu ba oan atu fo tempu ba inan sira rekopera saude depois partus no kuidadu ne’ebe diak ba labarik sira nia suade.
“Tinan ida ne’e hahu husi Janeiru to’o Julho ita atinji ona ema 12.000 resin mak hetan ona atendimentu planeamentu familiar iha klinika MSITL no fasilidade saude ne’ebe ekipa Marie Stopes hala’o servisu ba,”Deputy da Silva hateten, iha servisu fatin Vila Verde, Dili.
Nia hateten, munisipio walu ne’ebe MSITL hala’o ona programa planeamentu familiar mak hanesan munisipio Dili, Baucau, Viqueque, Lautem, Ermera, Ainaro, Same no Bobonaro e seluk seidauk tanba limitasaun finanseiru.
Nia hatutan, metodu kontrasepsaun ne’ebe sira aprezenta no esplika ba inan sira mak metodu modernu (sona, pil, implant, IUD) no natural, depende ba familia (fen no la’en) mak hili metodu ne’ebe iha.
Nia informa, bazeia ba dadus ne’ebe MSITL iha hatudu katak numeru familia ne’ebe hili tama programa planemantu familiar kada tinan aas, tanba komunidade barak iha ona konesementu kona ba vantagen husi programa ida ne’e.
Iha parte seluk Membru Grupo Feto Parlamentar (GFPTL), Deputada Josefa Alvares Pereira Soares, rekonese esforsu Ministerio Saude no parseirus iha atividade promove programa PF ba familia sira e ohin loron ema barak iha ona konesementu hodi halo planu ba sira nia familia.
“Maibe labele para iha ne’e, tenke kontinua hodi promove situasaun ida ne’e, oinsa familia ida –idak bele halo planu ne’ebe diak ba sira nia familia,” Deputada Soares sujere.
Nia dehan, PF laos labele iha oan maibe fo espasu ba ona hodi fo oportunidade ba inan feto sira bele rekopera saude no tempu ba inan aman atu tau matan ba oan sira.
“Inan aman iha dever atu tau matan ba labarik sira nia saude, edukasaun, moral hodi forma labarik sira sai sidadaun ida ne’ebe diak, kontribui ba nasaun ho etika ne’ebe diak,” nia hateten.
Nia mos husu ba Ministerio Saude no organizasaun non governmental sira, labele promove deit metodu modernu maibe promove mos metodu natureza ba inan feto sira hodi hili, tanba metodu modernu dala ruma inan sira haluhan atu halo kontrolu, entaun bele prejudika fali sira nia saude.
