- Publika iha: 27 Agosto 2014
Ministru Saude, Sergio da Costa Lobo, hateten sei fo impaktu ba atendimentu saude publiku iha Ospital Nasional Guido Valadares (HNGV), maske Konselho Administrasaun kaer husi medikus espesialista sira.
Lobo hateten, atendimentu sei la’o nafatin tanba HNGV iha rekursu humanu ne’ebe sufsiente, presiza haforsa deit ekipamentus atu supporta atendimentu sira hotu.
“Iha haree sufsiente ona mak hau brani foti sira tau iha kargu xefia, ne’ebe hau hanoin laiha impaktu, sira iha esperiensia atendimentu, sira iha kapasidade diak liu tan atu halo planeamentu diak ba HNGV,” Ministru Lobo hateten, iha Bidau, Dili.
Nia hatutan, reformasaun ba estruktura ne’e normal ba iha instituisaun ida maske mandatu seidauk to’o ho objetivu atu hadia diak liu tan servisu saude ne’ebe kualidade ba komunidade sira.
Iha parte seluk, Membru Komisaun F (saude, edukasaun, veteranus, igualdade jeneru), Deputada Ilda Maria da Conçeicão, preokupa ho servisu Ministerio Saude nian ne’ebe muda ema la tuir nivel edukasaun tanba bele fo impaktu ba iha atendimentu.
Nia hatutan, governu hasai osan hodi forma medikus sira atu fo atendimentu direita ba komunidade sira laos kaer fali administrasaun fasilidade kontinua halerik falta medikus.
“Nia impaktu mak mosu mal pratika, tanba mediku senior sira muda hotu ba iha administrasaun medikus estagiario sira mak atende pasiente koko salah ita foti mate,” nia preokupa.
Entretantu Diretor Jeral HNGV, Dotor Jose Antonio Gusmão, rekonese laiha background ba iha manegementu, maibe ho konfiansa ne’ebe Ministru Saude fo sei esforsu atu aprende.
“Honestu, hau laiha bacgkround manegementu, hau espesialista obstetria no ginokologia servisu hanesan mediku kleur ona, maibe hau iha vontade atu aprende tanba ne’e hau presiza asesor iha finansas, rekursu humanu,” nia hateten.
Nia hatutan, nudar medikus espesialista hadomi nia profisaun tanba ne’e sei halao servisu espesialista nian iha oras estra semana ida dala ida tanba tenke halao servisu maneger nian.
