- Publika iha: 21 Dezembro 2022
Diretora Servisu Munisipál Saúde Manufahi, Florencia Corte-real Tilman, informa hahú fulan Janeiru to'o Setembru tinan 2022, rejista inan isin-rua hamutuk na’in 254 husi totál inan isin-rua 808 mak partu iha uma.
Diretora salienta, inan sira ne'e balun partu iha uma ho asisténsia husi profesionál saúde treinadu sira no barak mak partu ho asisténsia husi liman badaen tradisionál sira.
"Atu hateten katak iha maunisípiu Manufahi ne'e barak liu mak sei uza liman badae tradisional ou daya. Ami bele halo promosaun beibeik esplika, maibé fila fali ba komunidade. Dala barak sira sei uza tiha lai ramuan no halo tradisaun labele ona mak lori mai ami, entaun mai to'o ami tarde ona, tanba ne'e mak sira mate ne'e" nia hateten iha servisu fatin Same, Manufahi.
Nia dehan sira mós Rejista inan na’in-haat (4) mak mate, bainhira tuur-ahi no bebé na’in 18 mak mate durante iha inan nia kanotak no mate depois moris.
Nia hateten sira mós iha programa liga inan, hanesan meu ida atu fó informasaun ba inan sira kona-ba oráriu konsulta, nutrisaun no sinál perigu isin-rua nian.
Iha oportunidade ne'e, nia apela ba komunidade, liu-liu inan isin-rua sira atu hakbesik ba fasilidade saúde konsulta isin-rua no enkoraja inan isin-rua sira partu iha fasilidade saúde atu iha komplikasaun ruma bele hetan atendimentu lalais.
Iha parte seluk, Administradór Maunisípiu Manufahi, Arantes Isaac Sarmento hateten iha fator prinsipal tolu mak kontribui ba inan sira partu iha uma. No fatór sira ne'e mak menus koñesimentu, kondisaun fasilidade saúde rasik no infrastruktura hanesan estrada no transporte públiku atu fasilita inan sira asesu ba fasilidade saúde konsulta isin-rua no partu.
"Kompremisiu ida mak kontinua habelar informasaun atu lori povu mai besik sentru saúde no maternidade sira, liu-liu ba inan sira. Kontinua sensibiliza nafatin ba ita-nia komunidade no fó nafatin informasaun ba ita-nia komunidade, liu-liu inan isin-rua sira no laen sira tenke apoia feen mai konsultan iha sentru saúde atu ita prevene mortalidade inan no oan no malnutrisaun ba oan sira," Nia hateten.
Nia dehan fó orientasaun ba administradór postu, xefe suku, xefe aldeia sira atu partisipa másimu iha atividade sensibilizasaun informasaun sira ba komunidade atu bele hasae konsiénsia komunidade nian hakbesik aan ba fasilidade saúde sira atu hetan atendimentu ne'ebé di’ak.