- Publika iha: 29 Setembro 2021
Primeru Ministru Taur Matan Ruak hateten kuantidade vasina ne’ebe data validade remata iha fulan Outubro tinan 2021, bo’ot kuaze 500,000 resin tanba ne’e, governu halo hela esforsu atu administra vasina sira ne’e ba komunidade.
“Governu halo hela esforsu bo’ot pratikamente iha ultimo semana deside ona ministru sira sai hotu tanba kuantidade vasina ne’ebe ita simu 1.1 miliaun, no ita iha 500,000 resin maka seidauk ezekuta to’o ita nia validade remata ita kria skandalu bo’ot ida tanba pais sira ne’ebe fo ho hanoin salva ita nia sidadaun nia vida laos fo atu ita estraga,” nia hateten iha plenaria parlamentu nasional.
Nia mos husu membru parlamentu sira atu apoia governu halo kampanha vasinasaun iha fin de semana.
Konaba vasina a’at ne’ebe deteta iha Hospital Nasional Guido Valdares (HNGV) iha fulan Junho liu ba no iha munisipiu Suai, nia dehan akontese vasina a’at tanba neglijensia pesoal sira nian laos problema eletrisidade.
Nia haktuir ekipa Inspektur jeral Estado identifika laiha ema ida mak tau matan lorloron ou kontrola kondisaun jelera no temperatura, entau implika ba kualidade vasina.
Iha parte seluk, Diretur Executivu Hospital Nasional Guido Valdares (HNGV), Alito Soares rekonhese failansu ne’ebe akontese no simu rekomendasaun sira atu hadia jestaun sistema armazenamentu ba vasina.
“Hanesan dirijente no profesional saúde ita tane a’as kualidade servisu ba ema nia vida, baut ne’ebe presiza hadia ita tenke hadia no agradese ba rekomendasaun sira ita sei hadia,”
Nia hateten vasina ne’ebe ekipa deteta konseladu iha loron 15 fulan Junho tinan 2021, izola kedas la fo ba komunidade sira, maibe sira ne’ebe la konseladu sira konsege fo ba ema nain 700 resin.
Nia hatutan bazea ba rekomendasaun husi Organizasaun Mundial Saúde (OMS), sira halo ona avizu ba komunidade ne’ebe simu vasina iha HNGV iha loron 10 ate 15 fulan Junho atu mai simu fali vasina tanba vasina ne’ebe sira simu la efetivu.