- Publika iha: 25 Fevereiro 2021
Komando Jeral Polisia Nasional Timor-Leste PNTL orienta komando munisipiu sira atu reforsa implementasaun programa polisiamento komunitaria (KPK) hodi halo prevensaun ba krime iha baze.
Komandante Jeral PNTL, Komisario Faustino da Costa, hateten serviso polisiamento komunitaria dadaun ne'e lao diak tebes maibe presija plano diak identifika krime no tau iha prioridade hodi halo prevensaun.
"Atu halo prevensaun ba krime sira iha baze ne presija hodi reforsa polisiamento komunitaria no mos presija kordena ho autoridade lokal no prezidente autoridade," Komisario Costa dehan.
Nia dehan, atu hametin paz estabilidade iha baze ne'e serviso polisiamento komunitaria tenke iha komunikasaun diak ho autoridade lokal sira nune'e labele akontese krime.
"Ita husu komando munisipiu sira tenke kopera ho autoridade lokal sira halo diskusaun ho halo plano serviso hodi haforsa serviso polisiamento komunitaria," nia dehan.
Tanba ne'e nia dehan, polisia komunitaria tenke identifika problema sira depois halo plano no tau iha prioridade hodi halo prevensaun.
Iha fatin hanesan, Komandante Polisia Munisipio Lautem, Superientendente Xefe Antonio Fernandes hateten, iha Lautem husi parte polisia sempre halo aprosimasaun ho autoridade lokal no prezidente autoridade hodi reforsa implementasaun ne'e rasik.
"Ita nia komunidade sira mos apresia tebes ezistensia polisia komunitaria iha suku ne'ebe bele rezolve problema ho natureza semi publiku no kazu sivil," nia saliente.
Tanba ne'e nia dehan, implementasaun programa polisiamento komunitaria jere diak tebes tanba serviso apoio malu husi parte polisia autoridade lokal sira.
Alende ne'e nia dehan, durante ne'e iha Lautem la rejisto kazu krime maibe rejisto deit mak asidente, maibe asunto sira ne'e sei tau hamutuk oinsa atu bele prevene.