PCIC Iha Ona Ekipamentu Teste DNA

Polícia Científica de Investigação Criminal (PCIC), Policia Nasional Timor-Leste (PNTL), iha ona ekipamentu teste Deoxyribo Nucleic Acid (DNA) ne’ebé mak oferese husi governu China hodi fasilita sira-nia servisu liu-liu iha investigasaun ba kazu kriminál, nune’e mós sivil iha territóriu laran.

Ministru Justisa, Tiago Amaral Sarmento, dehan durante ne’e PCIC la iha ekipamentu teste DNA, hodi fasilita sira hodi halo prosesu ba kazu krimál sira, no kazu ne’ebé prosesu presiza liuhusi teste DNA, entaun tenke lori amostra (sampel) ba teste iha Portugal.

“Maibé ohin ita konsegue iha rasik ona ekipamentu teste DNA ne’ebé mak oferese husi governu China liuhusi Embaixada iha Timor-Leste, tanba ne’e ba oin ita bele halo ona teste iha Timor ho ekipamentu ho espesialista ne’ebé ita prepara ona,” Ministru JSarmento dehan iha Colmera, Díli.

Nia dehan, ekipamentu DNA ne’e importante tebes ba asuntu justisa nian iha tribunál ba prosesu kriminál no prosesu investigasaun nian, liu-liu iha PCIC ne’ebé mak iha área ausiliar iha área investigasaun ba Ministériu Públiku nune’e mós iha kompeténsia ba krime hirak ne’ebé define tiha ona iha lei, nune’e mós hetan pedidu husi tribunál liu-liu rekolla prova sira kona-ba teste DNA nian.

“Antes ne’e ita sempre teste DNA iha Portugal bazeia ba ita-nia akordu kooperasaun entre Timor-Leste ho Portugal maibé ohin ba oin ita sei la haruka tan ona teste DNA ba rai-liur, tanba ita iha ona ekipamentu DNA ne’ebé bele teste ba kazu krime no kazu sivil katak rekoñese oan, aman, inan, halo nusa,” nia informa.

Nia hatete, rekollimentu dados ka prova krime husi DNA ne’e importante tebes atu hato’o ba Ministériu Públiku bele aprezenta hodi halo akuzasaun iha tribunál hodi fó justisa ne’ebé loos ba ema hotu tuir lei ne’ebé vigora.

Tanba ne’e agradese tebes ba apoiu ne’ebéoferese husi governu Xina liuhusi akordu iha 2021 nian no ohin loron sira konsege entrega ona ekipamentu teste DNA hamutuk unidade 25 ba PCIC.

Iha fatin hanesan, Diretór PCIC, Vicente Fernandes Brito, dehan kona-ba rekursu humanus atu utiliza ekipamentu teste DNA antes ne’e preparadu ona.

“Ita iha espesialista superiór na’in-rua estudu iha Portugal no halo ona estájiu durante tinan ida, sira hetan ona tomada-posse husi ministru justisa agora hein de’it instala ekipamentu ne’e ita-nia espesialista sira halo sira-nia servisu, nune’e mós ita avansa fó formasaun membru PCIC seluk hodi apoiu servisu nune’e bele fó ajuda ba tribunal no ministériu públiku fó justisa ne’ebé realidade ba ema hotu,” nia dehan.

Entretanto, Embaxadór China iha Timor-Leste, Xiao Jiangou, dehan Governu China kontente tebes bele apoiu governu Timor-Leste liu-liu iha área justisa, seguransa, no defesa.

“Ami espera katak husi ekipamentu ne’e ami apoiu bele ajuda servisu investigasaun Polícia Científica de Investigação Criminal (PCIC) ohin no iha futuru,” nia dehan.

Nia dehan, iha futuru governu China nafatin prontu apoiu PCIC liu-liu kona-ba ekipamentu nomós formasaun sira.