- Publika iha: 09 Maio 2024
Badan Narkotika Nasional (BNN) servisu hamutuk no Polísia Nasional Timor-Leste (PNTL) hodi kontrola movimentu droga iha área fronteira terestre entre Timor-Leste ho Indonesia.
Komisario Jeral Polísia Republika Indonesia, Marthinus Hukom, dehan fronteira terestre entre Timor-Leste ho Indonesia ameasa no sempre akontese transasaun droga no tanba ne'e mak presiza halo prevensaun ba tranzasaun droga ne'ebé sempre akontese liuhusi dalan ilegal sira no presiza servisu hamutuk atu bele kontrola.
"Badan Nasional Narkotika servisu hamutuk ho Polísia Nasional Timor-Leste (PNTL) hodi apoiu halo kontrolu ba movimentu narkotika [droga] iha fronteira ilegal sira entre nasaun rua ne’e Timor-Leste ho Indonesia," Komisario Jeral Marthinus Hukom dehan.
Nia haktuir katak kria servisu hamutuk ne'e importante tebes atu fahe informasaun, kapasitasaun, hodi reforsa seguransa iha fronteira nasaun ida-idak nian.
"Ita mós servisu hamutuk no komunidade husi Timor-Leste no Indonesia ne’ebé mak hela besik fronteira atu bele kopera ho parte seguransa no apoiu informasaun bainhira hetan ema ruma ne’ebé maka hatama sasan ilegal inkliu narkotika [droga]," nia salienta.
Entretantu, Komandate Jeral Polísia Nasional Timor-Leste (PNTL), Komisáriu Henrique da Costa, dehan ne’ebe halo ho BNN akordu ne'ebe importante tebes hodi halo atendimentu ba droga nian iha fronteira.
"Liuhusi kooperasaun ne'e ita sei fahe informasaun ba malu ligadu ho movimentu ema no sasan iha fronteira, tanba utiliza liña fronteira iha ita-nia rai laran ne’e, maioria hodi halo tranzasaun ba sasan inkliu droga tama ba Indonesia," nia informa.
Nia dehan, dadaun ne'e koloka hela Unidade Patrullamentu Fronteira (UPF) no Alfandega no Polísia Militar nune'e mós servisu hamutuk ho Tentara Nasional Indonesia (TNI) hodi asegura seguransa iha areas fronteira.