- Publika iha: 26 Janeiro 2017
Organizasaun feto servisu hamutuk ho partidus politiku sira kontinua fo formasaun hodi prepara feto sira ba tuur iha Parlamentu Nasional.
Diretora Fundasaun Patria, Laura Pina hateten sira identifika partidu politikus 10 atu servisu hamutuk fo kapasitasaun ba sira nia feto potensial sira.
“Iha ita nia lei elisaun parlamentar dehan minimu entre ema nain tolu ne’e tenke feto ida, entaun ami sei servisu hamutuk ho partidus atu fo formasaun kona ba pakote lideransa ba feto sira iha partidus politikus,” nia hateten iha Farol, Dili.
Nia dehan, formasaun hirak ne’e sei liga ho servisu no knar lor-loron membrus parlamentar nian iha parlamentu nasional, nune’e bainhira partidu fo fiar ba sira tuur iha parlamentu, sira hatene sira nia knar lolos.
Nia hateten, kada partidus politiku sira husu delega ema nain 10 ne’ebe tama ona lista kandidatu ne’ebe iha.
Entretantu, Prezidente Grupo Feto Parlamentar, Florentina Smith apresia ba servisu organizasoens feto nian hodi promove partisipasaun feto, maibe partidus politiku sira mos iha dever atu fo formasaun ba iha nia kandidatura sira.
“Hau espera, persentagen feto sei aumenta maibe depende mos ba iha servisu, see partidu servisu maka’as, maka nia ema barak sei tuur iha parlamentu inklui partisipasaun feto maka’as,” nia hateten.
Persentagen feto tuur iha parlamentu national kada tinan lima sa’e, iha elisaun jeral tinan 2002 persetagen feto iha parlamentu iha 25%, iha 2007 iha 28% no iha tinan 2012 sa’e ba 38%. Timor –Leste numeru um persentagen feto aas iha Asia.
