- Publika iha: 06 Agosto 2014
Royal Thai Embassy iha Timor-Leste halo demonstrasaun prosesu tein hahan Thailandia nian, ho intensaun atu desimina sira nia menu ba Timor oan sira no bele tein tuir.
Embaixador Thailandia iha Timor-Leste, Tawatchai Koopirom, hateten atividade ne’e ho objetivu atu introdus menu hahan Thailandia nian ba Timor oan sira atu hatene, tanba Thai restourante loke barak ona iha ne’e.
“Ami bolu expert husi Thailandia mai desimina menu hahan Thailandia nian no hanorin mos Timor oan sira oinsa tein aihan Thailandia ho produtu local ne’ebe Timor –Leste iha,” Embaixador Koopiron hateten, bainhira halo abertura ba atividades ne’e, iha Embaixada Thailandia, Motael, Dili.
Nia haktuir, atividade ne’e mos atu hametin relasaun amizade entre povu Timor ho Thailandia nian husi nivel altu to’o kraik.
Atividade ne’e, nia dehan, sai hanesan programa annual embaixada nian ne’ebe kada tinan hala’o, hodi introdus menu hahan Thailandia nian hotu ba Timor oan sira atu hatene nune’e mos Timor oan sira introdus mos menu hahan Timor oan ba sira.
Nia hatutan, atividade demostrasaun ne’e la’os deit realize iha Timor –Leste, maibe iha mundu.
Iha parte seluk, partisipantes Sebastiana da Conçeicão, hateten sira aprende duni buat barak kona ba tein hahan Thailandia, tanba Master Chef husi ne’eba nian mak mai hanorin.
“Diak tebes ba Timor oan sira atu hatene hahan Thailandia inklui ho nia prosesu tein, tanba agora sira nia restourante mos barak ona mak eziste iha Dili laran,” nia dehan.
Alende ne’e estudantes Ensino Tekniku Ospitalidade e Turismu Becora, Jhoni Ximenes, hateten pratika baziku ida ne’e ajuda tebes sira hodi eleva sira nia kapasidade no konesementu ba menu hahan Thailandia.
“Ami aprende menu hahan Thailandia kuaze 10 (menu) no ami sei ba pratika fali iha ami nia eskola, tanba durante ne’e ami pratika deit halo dosi no tein hahan Timor nian,” nia dehan.
Atividade demonstrasaun tein hahan Thailandia ne’ebe hala’o durante loron rua ne’e hetan partisipasaun masimu husi estudantes ospitalidade e turismu inklui komunidade sira.
