- Publika iha: 03 Maio 2016
Ministeriu Obras Publiku, Transporte e Komunikasaun (MOPTK) liu husi Laboratorium Nasional (LabNas) konsege sobu ona projetu hat ne’ebe mak kategoria laiha kualidade.
Diretor LabNas, Saturnino Gomes, hateten laboratorium nasional foti medidas sobu projetu ne’ebe laiha kualidade, tanba kompania balun halo estrada la tuir BOQ no dezenhu ne’ebe iha.
“Iha BOQ no dezenhu dehan tau alkatraun ho nia tebal ne’e 10 sentimu, maibe talves sira tau to deit neen deit ou walu sentimu, ne’e viola ona regras,e ami tenke sobu,” Diretor Gomes hateten, iha Dili.
Wainhira ba sobu projetu hirak ne’e, nia dehan, dala barak mosu dezkontente inklui intervensaun balun, maibe ekipa ne’e nafatin firme no konsege sobu ona projetu hat iha parte Bidau, Hudi Laran, Portu Dili no Kaikoli, tanba laiha kualidade.
“Ladiak ami dehan ladiak no diak mai dehan diak, tanba halo projetu ne’e uza osan povu nian,” nia dehan.
Antes ba sobu projetu ruma, nia afirma, ekipa LabNas halo uluk justifikasaun tanba saida halo inspesaun ne’e.
Iha parte seluk membru Parlamentu Nasional, Deputadu Antonio Serpa, apresia ho servisu ne’ebe mak husi parte ekipa LabNas halo, tanba ne’e kontribui ba hadia kualidade obra.
“Ne’e sira nia knar atu haree, karik ladiak sira sobu, tanba ita hakarak obra ne’ebe mak kualidade diak,” nia apoia.
Tanba tuir nia, kuandu iha BOQ no dezenhu determina katak obra ne’e sei dura to’o tinan 20, entaun hahu husi inisiu tenke halo ho kualidade, atu nune’e dura tuir duni planu tempu ne’ebe iha ona.
“Dura ne’e bazea ba saida mak ita halo husi dasar ne’e, se nia dasar kualidade ona, entaun obra ne’e bele dura duni to’o tempu ne’ebe mak ita determina ona,” nia hateten.
Tanba ne’e, nia sujere, ba governu atu prepara orsamentu hodi halo manutensaun ba estrada sira ne’e, nune’e estrada labele aat lalais.