- Publika iha: 14 Novembro 2017
Komandante Polisia Munisipiu Dili, Superintendente Asistente Euclides Belo husu ba komersiante sira (kios no lojas) hotu atu labele fa’an fugetes no uja paison durante loron bo’ot Natal no tinan foun nian, hodi komunidade hotu bele moris iha situasaun ne’ebe hakmatek no harmonia.
Nia hateten, tanba bainhira komersiante sira fa’an no ema ba sosa, depois sunu halo tarutu e halo komunidade sira trauma e bele mos mosu insidente iha komunidade nia le’et.
“Hau husu ba komunidade sira atu kontrola oan sira labele sosa no sunu velas, fugetes no paison tanba sasan hirak ne’e proibido tuir lei ne’ebe vigor,” Komandante Belo hateten, iha Dili.
Tanba ne’e, nia husu ba komunidade sira atu koopera ho autoridade seguransa, informa ba polisia karik hetan ema ruma fa’an fugetes no paison, nune’e bele halo atuasuan.
“Ba se deit mak kontra no la halo tuir, polisia munisipiu Dili sei foti asaun tuir lei haruka, polisia sei kapturahodi submete ba prosesu investigasaun tuir sirkular ne’ebe estadu liu Ministeriu Publiku fo sai,” nia hateten.
Entretantu negosiante, Abilio Martins hateten diak liu hapara fa’an fugetes iha loron Natal no tinan foun nian, atu nune’e iha loron ne’e ema hotu bele hakmatek hodi simu Nai Jesus ho paz no establidade nia laran.
“Fugetes ka paison ne’e kuandu sunu dalaruma bele halo ema seluk nia hanoin ne’e ba buat seluk, no sira trauma rona fugetes no paison nia lian, tenke hapara,” nia sujere.
“Ami bele la fa’an fugetes, maibe oinsa sira ne’ebe sunu velas ho ahi kose no paison ne’e uza mina rai.”
Tanba ne’e, nia husu ba Polisia Naisonal Timor-Leste (PNTL), tenke kontrola maximo iha bairo hotu iha Dili laran atu labele sunu fugetes ka paison no velas durante loron bo’ot rua ne’e.