- Publika iha: 26 Abril 2024
Diretora Ezekutiva Organizasaun Strela+, Ines Lopes, rekoñese stigma no deskriminasaun ba pasiente HIV-SIDA ne’e mai husi pesoal saúde no família pasiente sira, tanba seidauk iha koñesimentu no komprensaun kona-ba moras HIV-SIDA.
“Stigma no deskriminasaun ne’e loos duni katak, barak mai husi pesosal saúde sira, maibé la’ós de’it mai husi pesoal saúde sira de’it, mai mós husi mós família, kolega no komunidade tanba ema sira ne’e, konsidera ema ne’ebé hetan moras HIV-SIDA hanesan moras aat, entaun sira lakohi besik ba ema sira-ne’e.
Mosu stigma no deskriminasaun ne’e, tanba ema hanoin moras HIV-SIDA ne’e hanesan moras sira seluk ne’ebé fasil atu hadaet. Maibé moras HIV-SIDA ne’e diferente tebes ho moras seluk ne’ebé hadeit liuhusi anin no iis, tanba bainhira ema ida hetan HIV ne’e liuhusi prosesu balun hanesan relasaun seksual, daun, lamina, no ran,” dehan Diretora Ines.
Nia salienta, atu habelar informasaun ba komunidade sira mak tenki halo sosializasaun kona-ba HIV-SIDA, halo formasaun no fahe informasaun liuhusi média sira, atu nune’e komunidade sira bele hatene kona-ba moras HIV.
“Moras HIV ne’e henesan mós moras sira seluk, maibé sistema tratamentu mak la hanesa, tanba ne’e husu pasiente sira ne’ebé hetan ona moras HIV ne’e, tenki kontinua halo tratamentu,” nia apela.
Iha parte seluk, Xefe Departamentu Jestaun Programa, Servisu Saúde Munisipal Díli, Doutor Anacleto Guteres hateten, atu la bele akontese hahalok stigma no deskriminasaun mak tenki asegura pasiente HIV-SIDA sira-nia privasidade iha servisu fatin, nomós iha komunidade nia leet oinsá atu bele kuidadu ema-nia privasidade.
“Ministeriu Saúde halo hela formasaun kontinua ba ita-nia pesoál saúde sira liuliu ita-nia médiku parteira, enfermeiru sira, para atu bele asegura ema-nia privasidade iha servisu fatin. Ida-ne’e mak ministériu halo hela. Tempu ba tempu hadi'a neineik ita bele asegura privasidade iha servisu fatin nomós iha komunidade,” nia dehan.
Xefe Guterres mós husu ba média sira oinsá atu bele habelar informasaun sira-ne’e ba komunidade, atu nune’e bele halo tratamentu iha fasilidade sira ne’ebé iha, tanba ne’e iha munisípiu Díli, médiku, enfermeiru no parteira sira prontu atu bele fó atendimentu ba komunidade ne’ebé presiza tulun husi pesoál saúde.