Eskola Sira Eziji MEJD Tenke Kria Uniforme Nasional Ba Eskola

Eskola sira kontinua eziji Ministériu Edukasaun Juventude no Desportu (MEJD) atu kria uniforme nasionál ba estudante iha nivel Sekundáriu no Ensinu Báziku públiku no privadu iha territóriu laran.

Diretór ESG 4 Setembru, Martinho Menezes, hatete antes ne’e governu hatun ona sirkulár ba eskola hotu iha territóriu nasionál katak tinan ida-ne’e eskola ho inan-aman sira labele suku farda ba estudante sira, tanba MEJD deside ona kor no modelu ba uniforme nasionál estudante sira.

“Ita husu Ministériu Edukasaun Juventude no Desportu tenke kria lalais uniforme nasionál ba estudante sira atu nune’e bele hafasil eskola hodi kontrola estudante iha oras aprendisajen,” nia hatete.

Nia dehan, sirkulár husi MEJD fó sai ona maibé to’o agora eskola seidauk simu informasaun ida, kona-ba desizaun farda nasionál ne’ebé governu planea ona.

“Karik MEJD seidauk iha preparasaun di’ak, entaun tinan ida-ne’e eskola ho inan-mana sira mak prepara farda ba estudante sira, atu nune’e ministériu bele halo preparasaun ba futuru oin mai,” nia salienta.

Tanba ne’e nia dehan, bainhira MEJD Ia tau iha konsiderasaun ba uniforme nasional ho lais mak sei hamosu problema kada eskola sira, tanba defisil eskola sira atu identifika estudante mak ne’ebé no ema liur mak ne’ebé.

Entretantu, Diretór Ensinu Báziku Sentral Metinaro Duarte Amaral informa, eskola iha ona desizaun bainhira MEJD la prepara lalais uniforme nasionál ba estudante sira, bainhira atividade orientasaun hotu sira sei Ia halo prosesu ensinu aprendizajen.

“Ami hein hela bainhira orientasaun hotu mak Ministériu Edukasaun Juventude no Desportu seidauk foti desizaun atu suku farda foun ba estudante sira, ami sei deside Ia kontinua halo atividade aprendizajen ba estudante sira tanba ami lakohi foti risku ba eskola,” dehan nia.

Tanba ne’e husu tenke aslera lalais uniforme nasionál ba estudante sira tuir modelu no kor ne’ebé mak MEJD deside ona tanba husi pare eskola fó sai ona avizu ba estudante sira katak labele prepara farda tanba governu sei prepara.

Iha parte seluk Dirtór Jerál MEJD, Antoninho Pires, dehan tinan ida-ne’e eskola hotu sei utiliza ona uniforme nasionál tuir despaxu ne’ebé mak prepara ona hodi fo ba eskola sira.

“Iha despaxu ba uniforme nasionál ne’e governu la prepara uniforme maibé, ami prepara modelu no kor fo ba inan-aman sira mak prepara rasik,” DG MEJD Pires dehan via telefone.

Tanba ne’e nia dehan, dentru iha tinan ida-ne’e eskola hotu iha territóriu nasionál tantu públiku no privadu sei utiliza uniforme nasionál.