PNTL: Membru Tránzitu Halo Kobransa Ilegál Aplika Sansaun Disiplinár

Xefe Departamentu Tránzitu Seguransa Rodaviaria Nasional, Superientendente Asistente Luis da Costa dehan membru tránzitu ne’ebé komete kazu kobransa ilegál ba infrator sira, ne’e sei aplika sansaun disiplinár ba membru sira ne’ebe determina kulpadu.

Nia dehan, publiku bainhira hetan membru tránzitu balun ne’ebé mak komete iha kazu kobransa ilegál ba infrator sira, tenke hasai foto no hato’o keixa iha Departamentu Tránzitu Seguransa Rodaviaria Nasional nian, nune’e bele aprezenta provas ba komandu hodi halo prosesu.

“Ita la tolera membru tránzitu ne’ebé mak halo kobransa ilegál hodi hafoer instituisaun nian,” Xefe Departamentu Superientendente Asistente Costa dehan.

Nia husu ba publiku tenke hato’o keixa ba iha Departamentu Tránzitu Seguransa Rodaviaria Nasional, aprezenta ho faktus bainhira hetan membru tránzitu balun halo kobransa ilegál iha terenu bainhira halo cek point.

“Ita husu hato’o keixa formal no aprezenta faktus no labele posting deit iha media sosial.” nia dehan.

Enkuantu nia dehan, bainhira membru sira halo aprensaun ba dokumentu transporte nian ka karta kondusaun sira sei fo billeti infrasaun rua, ida iha terenu no ida sei mai foti iha komandu hodi ba selu iha banku la’ós husu osan, tanba lei kódigu estrada númeru 6/2003 la autoriza.

Iha parte seluk Motorista ho inisial SL alega katak membru tránzitu balun halo kobransa ilegál ba kondutor no motorista sira iha terenu bainhira sira halo cek point, maibé husi parte kondutór sira lakohi hato’o keixa, tanba dalaruma iha ona konkordánsia.

“Ita haree bainhira cek point prende surat motorizada ka karreta nian depois bolu malu la’o sees tiha fó sigaru nian bele foti fali surat bele la’o ona. Ida-ne’e la’os membru tránzitu de’it mak sala, maibé motorista sira mós kontribui,” nia dehan.