- Publika iha: 29 Março 2023
Ministériu Transporte no Telekomunikasaun (MTT) no parseiru MAF lansa aviaun 2 hodi fasilita kualker momentu ka situasaun emerjénsia ba komunidade iha munisípiu hitu (7) Oecusse, Viqueque, Covalima, Díli, Atauro, Baucau, no Bobanaro.
Vise-Ministru MTT, Flavio Cardoso Neves dehan kuaze tinan 20 ona Timor-Leste enfrenta estrada la di’ak no iha área rurál balun mós karreta, motorizada labele asesu, difikulta tebes komunidade iha situasaun emerjénsia sira.
“Ho lansamentu aviaun rua (2) ne’e ba munisípiu hitu (7) atu fasilita ita-nia komunidade iha situasaun emerjénsia ne’ebé presiza tebes hodi tulun ita-nia povu,” nia hatete.
Tanba ne’e aviaun ne’e atu bele fasilita komunidade ne’ebé enfrenta situasaun emerjénsia hanesan, transporta mai hospital nune’e mos ba atividade emerjénsia sira atu bele transporta ho lalais.
“Aviaun rua ne’e banhira halo opresaun nia kustu la hanesan, ezemlpu Díli-Atauru $30.00, Díli-Baucau $50.00 ne’e ba komunidade lokál ba komunidade estranjeru nia kustu $80.00,” Vise-Ministru MTT Neves dehan iha areoportu internasional Dili.
Nia dehan, iha aviaun rua mak sei halo opersaun hodi fasilita nesesidade sira ne’ebé urjente husi munisípiu ba munisípiu seluk nune’e mós munisípiu mai kapital.
“Lori governu nia naran agaradese ba parseiru MAF Timor-Leste tanba bele estabelese voo ida ne’e hodi fasilita ita nia komunidade iha situasaun emerjénsia liu-liu iha munisípiu hitu (7) ne’ebé mensiona,” nia saliente.
Iha fatin hanesan, Chief Operations Officer MAF, Norman Baker hatete, MAF nu’udar organizasaun Kristaun non-lukrativu ho nia misaun tulun, esperansa no rekoperasaun ba komunidade iha área remota iha mundu liuhusi operasaun aviaun.
“Ami halo ona opersaun iha nasaun hamutuk 34 iha mundu hodi transporta maluk sira-ne’ebé iha área remota, no ajuda misionáriu sira, igreja nune’e mós transporta moras emerjénsia sira ba hospitál,” nia dehan.
Tanba ne’e ohin governu Timor-Leste no MAF lansa tan voo ne’e no aviaun rua sei halo opersaun iha munisípiu 7 ne’ebé mak identifika ona.
“Aviaun rua ne’e kada aviaun tula pasajeiru na’in 6 no nia durasaun, ezemplu Díli Viqueque minutu 30 no ita garante katak viajen ne’ebé seguru no lalais, no aviaun refere mai husi Australia,” Chief Operations Officer MAF Baker hatete.
Enkuantu nia dehan, iha Timor-Leste lansa de’it ba munisípiu 7 ne’e tanba iha kampu aviaun seguru no di’ak atu aviaun sira bele tuun, ba munisípiu seluk la iha kampu aviaun.