- Publika iha: 19 Setembro 2023
Conselho de Imprensa (CI) servisu hamutuk ho Comisaun Nasional ba Eleisaun (CNE) no Sekretariadu Tékniku Admistrasaun Eleitoral (STAE) realiza formasaun espesífiku hodi hametin kopenténsia jornalista iha kobertura eleisaun suku.
Membru CI, Fransisco Belo Simões da Costa, dehan formasaun ne'e importante tebes hodi hadia liutan koñesimentu hodi habelar liutan kobertura jornalista iha eleisaun suku.
"Formasaun ne'e atu hametin profesionalizmu jornalista nian atu bele halo kobertura ne’ebé mak balansu, nune'e kontribui ba paz iha ámbitu eleisaun," nia dehan.
Tanba ne'e nia dehan, formasaun refere importante tebes ba jornalista sira atu bele prodús notísia tuir nia kódigu étika, no labele akontese tan hanesan eleisaun bo'ot rua ne’ebé akontese ona iha média barak mak halo notisia la iha balansu nakonu ho hoax, nune'e mós kontribui ba instabilidade.
Iha fatin hanesan, Diretor STAE, Acelino Manuel Branco dehan, papel jornalista iha eleisaun ne'e importante tebes hodi publika informasaun ne’ebé loos no kredivel ba publiku sira.
"Kobertura ba eleisaun ne'e importante tebes atu bele fasilita informasaun ne'ebe mak loos ba komunidade iha eleisaun suku ne’ebé sei realiza iha dia 28 outubru," nia dehan.
Enkuantu nia dehan, iha eleisaun suku ne'e direferensa ho eleisaun prezidensiál no parlamentár, tanba iha eleisaun suku ne'e vota dala tolu, Xefe Suku, Xefe Aldeia, nune'e mos Konsellu Juventude.
Entretantu, Jornalista Maria Taves dehan, formasaun ne’ebé realiza husi CI, CNE no STAE nesesidade tebes ba jornalista hodi halo kobertura iha eleisaun suku.
"Husu ba CI, CNE no STAE bele servisu hamutuk hodi bele fasilita jornalista sira asesu ba sentru votasaun hodi halo kobertura nune'e labele hetan intervensaun husi parte balun," nia dehan.
Tanba ne'e nia dehan, espera katak iha eleisaun suku ne'e sei la akontese tan desintendimentu entre jornalista ho poling staf ka brigada sira iha sentru votasaun bainhira asesu ba kobertura.