- Publika iha: 09 Outubro 2023
Peska ilegal kontinua tama sai livre Tasi Timor tanba Unidade Polisia Maritima (UPM) la iha Ro bo'ot hodi halo intervensaun ho lalais.
Komandante Jeral Polisia Nasional Timor-Leste (PNTL), Komisariu Henrique da Costa, dehan peska ilegal dadaun ne'e kuntinua tama no sai livre hodi naok riku soin Timor-Leste nian iha tasi hanesan foin lalais akontese iha Baucau no Lautem ne'e UPM labele halo intervensaun ho lalais tanba la iha ro bo'ot.
"Peska ilegal sira tama no sai tasi Timor ita hare husi do'ok deit, UPM, labele halo intervensaun tanba ho ro kiik labele tama to'o tasi klaran hodi halo atuasaun. Ita obriga an tama to'o tasi kalaran mos ema sai fali ona," nia dehan.
Tanba ne'e nia dehan, movimentu peska ilegal kuntinua tama sai livre hodi naok riku soin Timor-Leste nian ne'e problema soberania nasional nian laos UPM nia deit.
"Ita nafatin hala'o misaun hodi kontrola esforsu ho meius oin-oin maibe problema mak ita la iha ekipamentu ka ro ne'ebe mak bo'ot hodi kontrola to'o tasi klaran. Ita atu halo atuasaun ho ro ki'ik ne'e defisil tebes," nia informa.
Tanba ne'e nia dehan, kada tinan fo sai relatoriu katak riku soin Timor-Leste nian lakon barak tebes.
"Kestaun seguransa iha tasi ne'e presija ita hare hamutuk, konaba atu sosa ro bo'ot ne'e sei gasta orsamentu boot, maibe Komandu PNTL kontinua fo hanoin ba governu liu husi Ministeriu Interior atu tau atensaun ba iha servisu Unidade Polisia Maritima nian iha tasi," nia salienta.
Entretantu, Ministru Interior Francisco da Costa Guterres hatete, difikuldade hotu ne'ebe mak PNTL no Unidade sira hasoru ne'e sei rezolve fase por fase.
"Dadaun ne'e ita fokus ba rezolve problema reforma no rekrutamentu. Konaba ba sosa Ro bo'ot ba Unidade Polisia Maritima (UPM) ne'e ita tau ona iha planu orsamentu tinan 2024 nian espera katak ita bele rezolve ona ro ba UPM iha tinan oin," nia salienta.
Tanba ne'e, Nono Governu liu husi Ministeriu Interior sei esforsu makas atu nune'e iha tinan 2024 ne'e bele rezolve ona ro bo'ot ida ba UPM hodi bele apoiu sira halo misaun asegura seguransa ba riku soin Timor-Leste nian iha tasi.