Administradór Baucau Villa Orienta Agrikultór Kuda Aihoris Idade Badak

Administradór Postu Administrativu Baucau Villa, Isencinio Antonio da Silva hateten sira oriental ona estensionista sira atu informa no akompaña agrikultór sira aproveita bee oituan ne’ebé ita kuda aihoris ne’ebé ho idade badak atu bele asegura aihan ba komunidade.

Nia dehan servisu Metereolojia deklara ona Timor-Leste sei enfrenta El nino katak, udan bee menus, ne’ebé provoka problema barak liga ho saúde públika, disponibilidade aihan ba komunidade.

"Saida mak ita fó hanoin ba komunidade mak bele kuda aihoris ne’ebé mak idade badak atu aguenta han, tanba ne'e mak ita komesa sosializa ba sira ita koopera ho estensionista no agrikultór sira para bele aproveita udan bee kuda aihoris ne’ebé mak ho idade badak.

Ita mós fó hatene sira atu kolleta bee hanesan kee rai kuak atu trava bee hodi aproveita rega aihoris sira," nia hateten bainhira partisipa orientasaun kampaña Integradu prevensaun no Edukasaun Saúde Iha Sentru Saúde Bucoli, Baucau.

Nia hateten asaun ida la’ós ho skalaun bo'ot, maibé toos ki'ik sira iha uma sorin hodi asegura de’it disponibilidade aihan ba família.

Nia hatutan aihoris ne’ebé ho idade badak ne'e barak inklui mos batar no hare ne’ebé presiza deit fulan tolu bele kolleta ona.

Nia informa komunidade atualmente enfrenta ona insufisiente hahan, tanba tinan ne'e produsaun menus no natar barak kuaze 100 hektares la halo kultivu.

Kona-ba asesu eletrisidade no bee moos, nia dehan maioria komunidade 85% asesu ona ba liña eletrisidade no asesu bee moos, ne’ebé fornese husi Bee Timor-Leste.

Tuir dadus demografia, total suku iha postu administrativu Baucau Villa hamutuk 11, aldeia 65 ho total populasaun 57,000.

Iha parte seluk, Xefe Suku Bucoli, Xefe Suku Terezinha de Jesus dos Reis hateten komunidade difisil asesu ba aihan ne’ebé sufisiente ba família ida-ida tanba produsaun menus no presu sasan iha Merkadu moos karun.

Nia dehan situasaun ida-ne'e hanesan dezafiu boot ba povu no estadu nia esforsu kombate malnutrisaun no inseguransa aihan.

"Husu governu atu kontrola mós folin sasan iha kerkadu, liu-liu hatun folin atu ema iha kbi'it sosa, tanba mudansa klimátika halo produsaun menus," nia hateten.

Nia hateten komunidade Idozu sira simu osan oituan atu sustenta aan, maibé osan ne'e mós la sufisiente atu sosa aihan, tanba folin aihan iha merkadu karun.

Nia informa suku Bucoli iha potensial ba hare no batar, maibé tempu kuda batar liu ona udan bee seidauk mai.