- Publika iha: 12 Abril 2024
Jestór Operasaun Interina husi World Vision Timor-Leste (WVTL), Emelita da Cruz hateten, kona-ba ba konsumu ai-han importasaun ida ne’e liga ba atitude no konsiénsia ema ida-idak nian.
Nia dehan husi parte WVTL sei halo atividade oinoion hodi hasa'e komunidade sira nia konsiénsia kona ba ai-han saida mak iha nutrisaun, oinsá atu apoia sira atu bele hetan ai-han sira ne’ebé iha nutrisaun di'ak iha sira nia toos rasik, atu nune’e sira bele konsumu rasik ai-han ne’ebé sira kuda, la presiza atu ba hola fali ai-han importasaun sira.
“Ami mós hanorin sira kona-ba oinsá atu konsumu ai-han sira ho maneira oin-oin maski ai-han lokál, maibé liuhusi maneira oin-oin bele atrai sira-nia vontade no sira oan mós bele iha vontade atu konsumu ai-han sira ne’e,” nia dehan hafoin remata lansamentu ba livru ‘Ai-han Diak Saude Di'ak’ iha Díli.
Nia hatutan, prátika ne’ebé komunidade sira halo dala ruma fora husi kontrolu tomak, maski sira hatene katak ai-han importasaun sira hanesan ayang-potong ne’e la di'ak, maibé sira ba nafatin hola, ida-ne’e hanesan atitude komunidade nian ida ne’ebé la fasil atu muda, entaun presiza tempu barak no esforsu ho maneira oin-oin atu nune’e komunidade ne’ebé iha ona koñesimentu bele prátika hahalok saudavel ne’ebé di'ak iha sira nia moris.
Iha parte seluk, reprezentante Prezidente Repúblika (PR), Bella Galhos hateten, ai-han ne’e nakonu ho kultura maibé iha Timor-Leste, komunidade sira barak la iha korajen hodi buka atu hatene ai-han sira-ne’e, tanba komunidade sira toman ona, saida mak sira han loron-loron ida-ne’e mak sira hatene.
“Ita lakon rekursus boot ne'ebé eziste, ita la hatene importante ba ita-nia saúde, tanba ne’e di'ak tebes ba World Vision, imi bele kee didi'ak ai-han sira ne’ebé iha nutrisaun di'ak ba ita-nia saúde. Tanba ne’e ho livru ne’ebé ita iha bele haforsa ita-nia koñesimentu di'ak atu halo peskiza hahú husi ita pesoál família, komunidade, atu identifika ai-han sira ne’e mak iha no importante ba ita-nia saúde,” nia dehan.
Nia salienta katak ai-han ne’ebé la iha nutrisaun nia impaktu ba labarik ki’ik sira no mós ba ema boot, la'ós de'it impaktu ba kakutak, maibé impaktu ba isin lolon tomak.