Eskola IPB Kontinua Menus Fasilidades

Diretor da Instituto Politeknika Betano (IPB), Paulino Ribeiro hateten sira nia eskola to’o agora sei menus fasilidades estudu nian hanesan laboratorium inklui ekipamentus pratika nian.

Tuir nia, situasuan ida ne’e difikulta tebes estudante sira atu halo sira nia estudu ho diak, portanto buat rua ne’e importante tebes hodi fasilita sira nia estudu.
“Eskola ne’e menus fasilidade hanesan sala laboratorium no ekipamentos sira ida ne’e difikulta tebes esutante sira labele halo pratika,” nia hateten, iha Dili
Nia informa, Instituto Politekniku Betano iha departamento rua, mak Konstrusaun Sivil no Saude Animal, nia prosesu aprendisagem la;o normal, maibe dosente sira hanorin teoria deit no pratika laiha tanba ekipamemntos pratika laiha.
“Ida ne’e sai dezafios bo’ot mai ami, tanba lor-loron estudante sira simu teoria deit, pratika laiha tanba fatin pratika laiha no ekipamentos sira mos laiha,” nia dehan.
To’o agora, nia dehan sira hein governu foun liu husi Ministerio Edukasaun bele responde lalais ba problema hirak ne’ebe mak eskola ne’e infrenta hela.
Entretanto Diretor Jeral Ministerio Edukasaun (ME), Antoninho Pires hateten ministerio dadaun ne’e buka hela meios atu halo kobertura ba eskola sira ne’ebe mak seiduak iha fasilidade ne’e inklui IPB.
“Ita halo hela kobertura ho kondisaun minimo ne’ebe balun iha ona, seluk seidauk,” nia hateten.
Kona ba eskola hirak ne’ebe seidauk ne’e, nia dehan ministerio tau nafatin iha prioridade hodi bele kontinua halo kobertura ba iha ne’eba.
Iha sorin seluk, Sekretario Nasional Rede Edukasaun Timor- Leste Coalition for Education (TLCE) Jose Monterio hateten uluk estudante barak mak iha interesante ba eskola iha ne’eba maibe to’o klaran balun sai fali tanba fasilidade laiha no mos professor sira ne’ebe mak hanorin iha ne’eba ne’e la fo kualidade ba estudante.
“Simu teoria deit maibe pratika laiha, ne’e ita gasta tempu deit,” nia hateten.
Tanba ne’e, nia rekomenda ba Ministerio Edukasaun tenke iha maneira ruma atu nune’e bele garante katak estudante sira ne’e iha vontade diak , motivasaun nafatin atu eskola maske fasilidade seidauk kompleto.