Forsa Naval EUA Finaliza Ona Konstrusaun Eskola 104 Iha Timor

Forsa Naval Estados Unidos Amerika (EUA) durante ne’e finaliza ona konstrusaun insfraestrutura eskola hamutuk 104 iha Timor-Leste.

Embaixador EUA Tom Daley hateten konstrusaun ba eskola 104 hahu iha tinan 2009, wainhira sira hahu sira nia misaun iha Timor-Leste hodi apoio dezenvolve FALINTIL-Forsa Defesa Timor-Leste (F-FDTL) nune’e mos apoio Ministerio Edukasaun Juventude no Desporto (MEJD) konaba apoio konstrusaun eskola sira iha rai laran.

“Eskola 104 ne’ebe mak sira finaliza ona konstrusaun ne’e komposto husi pre-eskolar to’o ensinu sekundario jeral no tekniku vokasional ne’ebe mak sai benefisiariu ba projeto konsturasaun husi Forsa Naval EUA,” Embaixador Daley hateten.

Nia dehan, ezistensia Forsa Naval Estados EUA iha Timor laos hare deit ba area seguransa maibe sira nia fuan moris hodi ajuda mos hadia futuru jerasaun foun nian iha area edukasaun.

“Ami kompromiso ba amizade ne’e sei dura nafatin ho Timor-Leste hodi apoio kuntribui ba dezenvolvimento iha Timor,” nia hateten.

Enkuanto nia dehan, total orsamento ba konstrusaun eskola 104 refere ho montante 50 milhoes dolares amerikanu, nune’e mos iha tempo badak sei konstrui tan eskola primaria 3 iha Baucau ho valor montante $290,000.

Entretanto, Ministro Ministerio Edukasaun Juventude no Desporto (MEJD), Armindo Maia, agradese tebes ba apoio ne’ebe mak durante tinan 13 Forsa Naval EUA nian ne’ebe mak konstrui ona infaestrutura eskola no kompleta fasilidade iha eskola hamutuk 104.

“Ita husu nafatin servisu koperasaun entre Timor-Leste no Estados Unidos Amerika (EUA) hodi hare fali ba area seluk ne’ebe presija hadia hodi dezenvolve edukasaun iha Timor-Leste,” MEJD Maia hateten.

Nia dehan, MEJD mos husu ba Forsa Naval EUA atu apoiu ekipamento balun ne’ebe mak nesesidade tebes hodi tulun ema ho difisiente asesu ba esdukasaun iha Timor-Leste.