- Publika iha: 23 Março 2023
Ministériu Admistrasaun Estatal (MAE) transfere ona orsamentu ba finansas kada munisípiu hodi implementasaun programa merenda eskolár.
Diretór Edukasaun Munisípiu Díli, Carlito da Silva dehan orsamentu ne’ebé sira simu hodi implementa progama merenda eskolár hamutuk millaun 3 resin ba primeiru trimestre nian.
"Orsamentu millaun 3 resin ne'e ba estudante hamutuk na’in 49.289 kompostu husi pre-eskolár no ensinu baziku ne’ebé mak asesu ba merenda eskolár tinan ida-ne'e," nia hatete.
Nia dehan, orsamentu millaun 3 resin ne’e ba tinan letivu 2023, maibé implementa ba fulan 10 nian de’it tanba fulan novembru no dezembru ne'e ferias-anuál ona.
"Merenda eskolár ne'e ita implementa ona iha eskola komesa dia 1 marsu ne'e no kada estudante iha direitu ba orsamentu 0,25 sentanvus kada loron," Diretór Silva dehan.
Entretantu, Diretór Edukasaun Munisípiu Aileu, Carlito Pereira dehan totál orsamentu merenda eskolár 2023 nian hamutuk $839,000 resin.
"Orsamentu $839,000 resin ne'e ba estudante hamutuk na’in 1275 kompostu husi ensinu pre-eskolár no ensinu báziku iha munisípiu Aileu," nia dehan.
Nia dehan, tuir loloos ne'e iha merenda eskolár iha munisípiu Aileu ne'e implementa ona maibé, programa ne'e iha mudansa ituan entaun implementasaun tarde.
"Ita-nia osan $839,000 resin ne'e ita utiliza ba merenda eskolár ba primeiru períodu nian uluk lai depois mak ita bele foti aumenta tan osan ba segundu no terseiru períodu nian," Diretór Pereira dehan.
Nia dehan, banhira implementa edukasaun sei servisu hamutuk ho parte saúde atu nune’e kontrola menu ne’ebé mak determina ona.