- Publika iha: 15 Agosto 2023
Komandu Falintil Forsa Defesa Timor Leste (F-FDTL) promove membru feto hamutuk na’in 12 husi Cabu ba diviza Sarjentu liuhusi kursu ne’ebé sira partisipa durante fulan haat (4) iha Sentru Instrusaun Komandante Nicolau Lobato iha Metinaro.
Diretór ba Formasaun Sarjentu no Kapitaun Infanteria Fransisco do Rego dehan, Sarjentu feto hirak refere durante ne'e partisipa formasaun hanesan mós ho mane sira, kona-ba treinu fíziku nune'e mós kona-ba siénsia hodi prenxe rekezitu ba postu Sarjentu.
Nia dehan, husi inisiu kursu iha feto na’in 12 ho mane na’in 141 hamutuk 153 mak tuir kursu ba Sarjetu kompostu husi Kuartel Jenerál no Unidade sira hotu iha F-FDTL.
"Liuhusi kursu ida-ne'e ita konsegue promove membru feto hamutuk na’in 12 husi Cabu ba Sarjentu no mane na’in 139, hamutuk 151 de’it, tanba na’in-2 lakonsege pasa iha kursu," nia dehan.
Nia dehan, durante kursu ne'e estruendu sira aprende ona teoria no prátika durante semana 18 no iha treinamentu ne'e tratamentu ba feto mane hanesan iha militár.
"Hau husu ba Sarjentu sira tau prátika saida mak imi hetan durante kursu iha imi-nia servisu no kontinua imi-nia profesionalizmu hatudu maturidade nu’udar sarjentu iha kareira militár nian," Diretór Rego hatete iha Metinaro.
Iha fatin hanesan Xefe Estadu Maior Falintil Forsa Defesa Timor Leste F-FDTL, Tenente Jenerál Domingos Raul “Falur Rate-Laek”, dehan durante kursu hatudu ona idaidak nia kbiit determinasaun espritu funu nian tantu militár feto ka mane.
"Ohin imi remata ona imi-nia kursu nune'e mós ohin inisiu ba imi hodi hala'o servisu nu’udar sarjentu iha ida-idak iha responsabilidade bo'ot liutan atu derije no fó inspirasaun ba malu no dalan ne’ebé imi sei la’o ba oin la fasil maibé ha’u fiar katak imi iha ona baze forte iha seguransa no abilidade atu hasoru dezafiu sira iha futuru," nia esperansa.
Nia dehan, misaun F-FDTL nian mak atu asegura pás no estabilidade iha rai doben ida-ne'e hodi fó espasu ba dezenvolvimentu nasionál, knaar militár importante liuhusi kontribuisaun direita no indireita, nune'e mós mantein knaar no disiplina, hodi sai ezemplu ba sosiedade no instituisaun.