- Publika iha: 24 Agosto 2023
Xefe Suku Soba, iha Postu Administrativu Laga, Munisípiu Baucau, Francisca Monica de Fatima Soares deklara prontu kandidata aan ba períodu da-tolu, iha eleisaun lideransa komunitária períodu 2023, tanba sei hakarak dezenvolve suku no serbí komunidade.
Xefe Suku Monica, iha eleisaun suku períodu 2009-2016, eleitu ba xefe suku no iha eleisaun períodu 2016-2023, eleitu ba segundu períodu. No iha eleisaun tinan ne’e, prontu atu re-kandidata, tanba iha mehi ne’ebé seidauk realiza katak komunidade iha asesu ba infrastrutura bázika, atendimentu saúde no asesu ba edukasaun.
“Ha’u sai xefe suku iha tinan 2009, to’o mai agora, iha períodu da-rua ona. Progresu ne’ebé ha’u halo mak liga ba dezenvolvimentu infrastrutura bázika, agora dadaun ami-nia komunidade aldeia neen asesu hotu ona ba bee moos, estrada hela de’it uma-kain 11 mak seidauk asesu no ha’u prepara ona proposta atu manda mai IGE loke dalan ba sira. No aldeia haat asesu ona eletrisidade hela aldeia rua mak seidauk asesu, maibé tama hotu ona iha planu nasionál atu dada liña eletrisidade,” nia hateten hafoin halo enkontru ho Sekretária Estadu Igualdade (SEI), iha Edifisiu SEI Kaikoli, Díli.
Nia hateten progresu seluk mak halo konstrusaun ba Ensinu Báziku Sental iha suku Soba no Ensinu Bazika Filial ida iha suku laran. Aleinde ne’e konstrui mós uma residénsia médiku nian no postu saúde ida iha suku laran.
Nai hatutan iha área formasaun nian, sira mós servisu hamutuk ho organizasaun sosiedade sivíl sira fó formasaun ba membru konsellu suku no joven sira kona-ba tópiku diferente atu eleva sira nia koñesimentu no abilidade.
“Ha’u hakarak atu hateten katak ha’u nu’udar feto ida ne’ebé durante iha ha’u-nia lideransa, ha’u sempre tau aas liu mak demokrasia ne’ebé kultura tenke halo separasaun. Ita feto mai la’ós atu ukun mai atu serbí, bainhira ita simu kargu ne’e la’ós oportunidade, ne’e hanesan responsabilidade ida atu asume serbí ita-nia komunidade ne’e ho loloos,” nia hatutan.
Nia informa suku Soba ho totál populasaun hamutuk 247, no iha aldeia neen, ne’ebé lidera husi mane maluk sira. Maibé sira apoia no kolabora malu di’ak ba dezenvolvimentu suku no moris di’ak komunidade nian.
Iha parte seluk, Sekretária Estadu Igualdade (SEI), Elvina Sousa Carvalho rekoñese 5% feto ne’ebé lidera suku, sira hotu lidera ho di’ak no hatudu iha mudansa signifikante tanba ne’e, fiar sosiedade sei fó konfiansa barak liutan ba feto sira atu lidera suku.
“Sai Xefe Suku ne’e la’ós nomeasaun polítika, ne’e demokratikamente hili liuhusi eleisaun. Entaun feto sira tenke kandidata aan no povu tenke fó fiar ba feto sira. Ha’u fiar katak povu sei fó konfiansa ba feto sira, tanba feto 5% ne’ebé lidera hela suku sira lidera ho di’ak no sira sai ezamplár no motivadora ba sira seluk,” nia hateten.
Nia konsente sei iha esterotipu diskriminatóriu ne’ebé eziste iha, maibé sosiedade komesa iha mudansa ba pensamentu sira no hahú fó konfiansa ba feto sira tur iha kargu sira foti desizaun no sai lideransa hodi kontribui ba dezenvolvimentu nasaun no povu.