- Publika iha: 27 Agosto 2023
Ofisiais Navegadór Ró Marina Real Británika HMS Spey, Gravenson enkoraja feto Forsa Falintil Defesa Timor-Leste (F-FDTL), liu-liu forsa mariña atu hakbi’it aan sai komandante, ofisiais navegadora no operadora ró nian, tanba feto iha sentimentu inteletuál no emosionál ne’ebé bele servisu hamutuk iha ekipa.
Nia dehan nu’udar ofisiál navegadora, nia servisu atu halo navegasaun ba ró no haree kondisaun tasi. Hanesan bainhira kapitaun dehan sira mai Díli, Timor-Leste husi Brisben, Australia, entaun nia servisu tenke dezeña mapamentu para uza hodi viajen mai Díli.
“Ha’u servisu iha ró ne’e tinan ualu ona, durante servisu ha’u haree iha igualdade jéneru di’ak tebes. Ha’u hanoin iha servisu militár iha igualdade entre feto no mane, dalaruma feto iha sentimentu inteletuál no emosional, bainhira servisu hamutuk iha ekipa sentimentu ne’ebé feto iha sempre buka servisu hamutuk ho ekipa,” nia hateten bainhira halo esplikasaun ba servisu ofisiais navigadór ba ekipa mídia nasionál, ne’ebé halo vizita ba Ró Marinñ Real Británika HMS Spey, iha Portu Díli.
Nia hateten sira iha rotasaun tolu, entaun presiza ofisiais tolu atu opera ró ne’e. No sira-nia rotasaun servisu fulan tolu iha ró laran, depois hetan fulan ida fila ba UK passa ferias ho família, tanba ne’e ofisiais na’in 75. Maibé dadaun ne’e iha de’it na’in 50.
Nia hatutan pursentajen feto mariñeru ne’ebé servisu iha ró ne’e na’in 20. Entaun dalaruma iha rotasaun komandante, ofisiais navegadór no operadór ba ró ne’e feto na’in tolu, signifika husi posizaun ida primeiru mai kraik feto na’in tolu mak komanda.
Iha parte seluk, Komandante HMS Lt Cdr Matthew Millyard hateten objetivu vizita Ró Mariña HMS Spey ne’e hanesan interkámbiu kulturál ho ró mariña Timoroan nian no estudante lokal sira. Ró HMS Spey hala’o tiha ona servisu tinan lima iha rejiaun Indo-pasífiku hamutuk ho ró irmaun HMS Tamar, sira servisu besik ho aliadu no parseru sira ajuda rezolve dezafiu seguransa oioin no suporta nasaun sira hasoru impaktu mudansa klimátika.
“Ró Naval seidauk mai vizita Díli iha tinan 20 nia laran, Kompañia Ró nian ho ha’u kontente loos atu hetan esperiénsia kultura iha nasaun furak Timor-Leste. Vizita ida-ne’e mós nu’udar opurtunidade optimu ba ami atu sosa sasan no ense mina hodi nune’e HMS Spey bele kontinua hala’o nia misaun iha rejiaun Azia-Pasífiku. Ami haksolok tebes ho ospitabilidade mak hatudu hosi Timoroan sira” nia hateten.
Nia dehan ró ne’e ambientalmente saudável, tanba iha instalasaun konverte kataliku ho funil hodi kapta no redús emisaun CO2. Durante tinan rua sira halo patrollamentu iha Indo-Pasífiku hodi kombate peska sira ne’ebé la reguladu, la reportadu no ilegál.
Nia espera iha futuru, Ró Mariña MHS Spey sei halo vizita regulár mai Timor-Leste.
Tuir informasaun ne’ebé TDW asesu, ró Marina HMS Spey ne’e tesi besi dahuluk iha fulan abril tinan 2017, lansa iha loron 19 juñe tinan 2019, fó naran HMS Spey iha loron 3 fulan Outubru tinan 2019, iha loron 18 fulan juñu 2021, hetan komisiu. Ró ne’e produsaun husi Govan Shipyard, Glasgow, Scotland, UK no Her Majesty’s Naval Base Portsmouth nu’udar baze portu ba ne’e para. Ró HMS Spey nu’udar ró naval da-ualu, nia velosidade 25-30 kts no bele atinji tasi 5500nm/10200km no nia kapasidade akomodasaun bele lori mariñeru 60 ho forsa embarkada 50 adisional, entaun hamutuk 110 pesoas.