- Publika iha: 19 Setembro 2023
Sekretariadu Tékniku Administrasaun Eleitoral (STAE) enkoraza feto kandidatu ba Xefe Suku, tanba tuir lei númeru 6/2016 la autoriza kandidatu mai husi mane de’it maibé obrigatóriu feto no mane.
Diretór Jerál STAE, Acelino Manuel Branco dehan, iha eleisaun suku ne'e kandidatu na’in rua ne'e tenke kompostu husi feto ida no mane ida, la autoriza mane de’it.
Nia dehan, bainhira iha suku ida mak kandidatu mai husi mane de’it mak eleisaun sei la autoriza, no presiza deklarasaun husi organizasaun feto sira katak iha suku refere la iha feto pontensiál ne’ebé bele kandidatu ba Xefe Suku, depois mak bele autoriza realiza eleisaun.
"Maibé kuandu iha eleisaun suku mak kandidatu mai husi feto hotu ne'e lei fó dalan, kuandu mai husi mane hotu mak sei la autoriza ida-ne'e lei númeru 6/2016 mak koalia," DJ STAE Branco dehan iha CI.
Tanba ne'e STAE enkoraza inan feto sira hodi bele kandidata an ba Xefe Suku iha eleisaun ne’ebé sei realiza iha dia 28 outubru agora.
"Ita enkoraza inan feto potensial sira atu kandidata ba eleisaun suku hodi kompete ho mane sira," nia salienta.
Entretantu, antes ne'e Diretora Organizasaun Movimentu Feto Foinsa’e Timor-Leste (MOFFE-TL), Yasinta Lujina dehan, partisipasaun feto iha nivel lideransa hatudu progresu di’ak tebes.
Nia dehan, progresu ne’ebé hatudu mak reprezentasaun feto iha Parlamentu Nasional atinji 40% no iha nível governu 15%, nível munisípiu menus tebes no prezidente autoridade ne'e foin iha feto ida husi 13 munisípiu no lider suku iha na’in 21.
"Ita presiza halo reforsa makas atu bele hasa'e partisipasaun feto iha nivel lokál ita enkoraza feto potensiál sira iha nivel lokál atu kandidatu ba an ba eleisaun suku," nia dehan.
Tanba ne'e nia dehan, partidu politiku sira iha papel importante atu hakbiit feto sira-nia kapasidade no abilidade hodi sai lideransa ne’ebé di’ak hahu husi nivel lokál to'o nasional.