Envolvimentu Feto Iha Bombeiros Menus Kompara ho Mane

Feto bombeiros Filomena Lay Freitas dehan, durante ne'e envolvimentu feto iha bombeiros menus liu kompara ho mane sira.

Nia dehan, iha instituisaun estadu presiza promove igualdade jéneru, maibé realidade iha bombeiros envolvimentu feto ne'e menus liu.

"Ita husu tenke tau prioridade ba rekrutamentu feto iha bombeiros, atu nune'e númeru partisipasaun feto labele menus tenke iha balansu," nia dehan.

Nia dehan, maské bombeiros ne'e servisu ne’ebé la’ós fasil maibé fiar katak, partisipasaun feto bele makas no forte liutan iha servisu atendimentu ba dezastre naturais ka salvamentu sira.

"Ha’u-nia mensajen ba feto maluk sira, labele tauk no tenke fiar an kompete ho mane sira iha misaun bombeiros nian. Tta feto mós forsa hodi servisu hanesan mós ho mane," feto bombeiros Lay dehan.

Nia dehan, maske feto iha difikuldade bainhira iha treimametu sira mak liga liu ba forsa entre mane no feto ne'e la hanesan maibé iha servisu sempre apoiu malu.

Entretantu, Diretór Nasional Bombeiros Claudio Silva dehan totál pesoál bombeiros dadaun ne'e iha na’in 300 husi nasionál to'o munisípiu sira.

"Husi pesoál na’in 300 ne'e kada postu bombeiros ita koloka membru hamutuk na’in 32 ne'e kompostu husi feto no mane, maské númeru feto ne'e menus liu kompara ho mane," nia dehan.

Nia dehan, envolve feto menus iha bombeiros ne'e la’ós, tanba governu la fó oportunidade ba feto atu inklina iha bombeiros maibé feto mak la mai prense iha rekrutamentu sira ne’ebé halo ona antes ne'e.

"Dadaun ne'e ita iha pesoal feto hamutuk na’in 43 mak servisu hamutuk ho mane sira husi nasionál to'o munisípiu," Diretór Nasional Bombeiros Silva dehan.

Tanba ne'e nafatin enkoraza inan feto sira labele tauk atu servisu hamutuk ho mane sira hodi serbí povu no estadu liuhusi misaun sagradu bombeiros nian, tanba feto mós iha forsa hanesan ho mane.