SEI Husu PNTL Kria Igualdade Jéneru Iha Instituisaun

Sekretária Estadu no Igualdade (SEII) husu Polísia Nasionál Timor-Leste (PNTL) tenke kria igualdade jéneru iha instituisaun laran hodi bele fó oportunidade ba polísia feto hodi espresa sira-nia matenek.

Sekretária Estadu SEI, Elvina de Sousa Carvalho, dehan polísia feto barak mak iha abilidade no matenek iha manutensaun ba paz maibé komandu seidauk oferese oportunidade másimu ba sira hodi envolve no lidera.

Nia dehan, PNTL ne’e eziste kuaze tinan 21 ida ona, maibé feto sai lideransa iha instituisaun refere menus liu kompara ho mane iha kargu xefia.

“Husu ba Komandu PNTL tenke kria igualdade jéneru iha instituisaun, nune’e bele fó oportunidade ba feto polísia sira hodi promove sira-nia abilidade no matenek hodi lidera,” SEI Carvalho dehan iha CFP Comoro, Díli.

Nia dehan, SEI mós nafatin servisu hamutuk ho PNTL liu-liu polísia femenina sira hodi bele promove igualdade jéneru iha área seguransa nian.

Iha fatin hanesan, Komandante Jerál PNTL Komisáriu Henrique da Costa dehan, feto PNTL sira iha kapasidade di’ak hodi hala’o servisu iha instituisaun no kobre área sira hanesan, segurasa tantu patrollamentu nune’e mós administrasaun.

Nia dehan, durante ne’e komandu PNTL servisu hamutuk ho parseru sira hodi fahe esperiénsia ba feto polísia sira hodi dezenvolve sira-nia esperiénsia iha lideransa nune’e mós empodera ba futuru.

“Hau husu ba femenina PNTL sira tenke iha komitmentu hodi dedika an tomak iha imi-nia servisu fatin, aproveita buka hatene siénsia foun sira ne’ebé relasiona ho kareira hodi hatudu imi-nia profesionalizmu,” Komisáriu Costa dehan.

Nia dehan, hanesan Komandante Jerál nafatin fó oportunidade ba feto polísia sira hodi asume responsabilidade másimu iha instituisaun.

“Ita hahú fó ona oportunidade ba feto PNTL sira hodi lidera komando Munisípiu nune’e mós komandante Esquadra, okupa kargu xefia sira iha PNTL, tanba ne’e ita husu atu servisu ho responsabilidade,” nia informa.

Nia dehan, implementasaun igualdade jéneru iha PNTL dadaun ne’e hahú la’o ona maibé seidauk másimu, tanba ne’e komandu nafatin esforsu hodi bele kontinua fó oportunidade ba feto polísia sira hodi lidera.

Enkuantu nia dehan, durante ne’e femenina PNTL ne’ebé lidera ona instituisaun PNTL hahú husi kargu importante sira iha Komandu Jerál no sai komandante Munisípiu no Esquadra hamutuk feto polísia na’in 75 ona no komandu nafatin esforsu atu bele aumenta númeru feto okupa kargu importante sira.