- Publika iha: 09 Fevereiro 2024
Diretóra Organizasaun Fundasaun Haburas Moris, Emerensiana Nipo informa Organizasaun Sosiedade Sivil (OSS) lima (5) hetan apoio orsamentu husi Uniaun Europeia Timor-Leste (UE-TL), kolabora ho organizasaun internasional ADRA fo formasaun konaba planu negosiu, jestaun negosiu no fornese ekipamentu-material prosesamentu ai-han ba grupo feto hamutuk 15 iha munisípiu Ainaro, Baucau, Bobonaro no Dili.
Nia dehan objetivu atividade ne’e mak atu hadia no reforsa rendimentu inklusivu iha area rurais, liu-liu apoia feto sira nia envolvimentu iha kadeia de valór ba to’os nain sira atu hasa’e sira nia abilidade hasa’e kualidade no kuantidade produsaun.
“Ami hare produtu sira ne’e dalabarak ita seidauk tau atensaun ba transformasaun produtu sira ne’e ba ai-han seluk. Ita mos hare produtu importasaun barak ita simu no konsumu, ita hakarak minimiza produtu importa sira ne’e tenke esforsu aan ho inovasaun no teknologia ne’ebé iha atu bele kompete,” nia hateten hafoin asina akordu koperasaun servisu ho ADRA, Rede Feto no Uniaun Europeia, iha salaun Rede Feto Caicoli, Dili.
Nia hateten sira identifika ona grupo tolu iha munisípiu Bobonaro, ne’ebé durante ne’e halo produsaun ba mantega fore rai, transforma foos mean, metan no mutin ba produtu trigu no transforma sukaer sai gem no rabsadu.
Nia hatutan sira sei muda mentalidade negosiu grupo sira nian konaba sistema merkadu ida ne’ebé diak no sustentavel mak hadia kualidade produtu, dezeñu embalagen ne’ebé diak no tau presu ne’ebé ki’ik atu ema bele sosa hela deit, nune’e rotasaun ekonomia lao la para.
“Ami dere odamatan supermerkadu sira iha munisípiu no ami lori produtu sira ne’e mai supermerkadu sira iha Dili, entau até agora supermerkadu 12 mak simu ami nia produtu sira ne’e,” nia hatutan.
Nia haktuir total subsidiu ne’ebé sira hetan hodi halao ativdade formasaun ne’e ho montante $15,000.
Entretantu, Diretóra Organizasaun Asosiasaun Unidade Feto ba Dezenvolvimentu, Bendita de Jesus Amaral, hateten sira hetan konfiansa ba dala-lima iha projeitu hakbi’it feto hodi fornese formasaun jestaun negosiu no abilidade teknika sira ba produsaun ai-han iha munisípiu Bobonaro, Baucau no Dili.
“Atividade foku liu iha formasaun ba grupo sira, oinsa sira hasa’e kualidade produsaun atu bele kompete iha merkadu no haforsa liu tan grupo sira sai indústria ki’ik liu husi oferese makina no abilidade operasaun nian atu fasilita sira halo produsaun,” nia hateten.
Nia dehan sira identifika ona grupo tolu iha munisípiu Dili, atu benefisia ba atividade formasaun hodi hasa’e sira nia koñesementu no abilidade produsaun ai-han.
Iha parte selu, Embaixadór Uniaun Europeia, iha Timor-Leste, Marc Fiedrich hateten importante tebes ba feto iha Timor-Leste iha poder ekonomia tanba susar tebes ba feto sira atu hetan sira nia direitu bainhira laiha baze ekonomia. Entau projeitu ida ne’e maneira ida atu fortalese direitu feto sira nian.
“Uniaun Europeia kontente tebes atu hare asina subsidiu hira ne’e. Ami finansia projeitu ida ne’e tanba ami hakarak fo forsa ba sosiedade sivil iha Timor-Leste, tanba ami hakarak hametin feto sira nia pozisaun iha nasaun ida ne’e no tanba ami hakarak ajuda dezenvolve sira nia ekonomia. Entau subsidiu ne’e sei kontribui ba objetivu tolu ne’e” nia hateten.
Nia dehan orsamentu ba projeitu ida ne’e ho montante £1,000,000 hodi subsidiu organizasaun feto sira hakbi’it ekonomia grupo feto iha area rurais.
Embaixador kongratula parseiru implementasaun organizasaun ADRA no Rede Feto nia esforsu hodi selesiona organizasaun lima hanesan Fundasaun Kolegas da Paz (KDP) iha munisípiu Baucau, Asosiasaun Unidade Feto ba Dezenvolvimentu (AUFD) iha Dili, Fundasaun Esperanca iha munisípiu Ainaro, Centro Nossa Senhora do Rosario (CNSR) iha munisípiu Dili, no Fundasaun Haburas Moris (FHM) iha munisípiu Bobonaro.