- Publika iha: 11 Julho 2011
Obstaklu bo’ot ne’ebe mak polisia feto sira infrenta durante ne’e mak oras servisu iha kantor barak liu duke iha uma, iha posibilidade bo’ot hamosu Violensia Domestika (VD) tanba la’en balun la komprende.
“Tanba la’en balun la kompriende kona-ba servisu polisia nian, polisia dala barak liu iha kantor duke iha uma, entaun bele hamosu violensia hanesan baku malu, e balun mos to’o fahe malu tanba la kumpriende malu,” hateten Xefe Seksaun Suporta Vitima VPU, Maria Laura Abrantes, semana kotuk iha Kaikoli, Dili.
Nia parte rekonese katak durante ne’e Instituisaun Polisia seidauk halo enkontru ruma ne’ebe involve polisia nia familia tomak, tanba ne’e mak dalaruma la’en balun seidauk kompriende kona-ba servisu polisia nian.
“Entaun bainhira ami fila ba uma, maske ami koko esplika ba sira maibe sira la simu, sira so hatene deit katak tuku 05:00 lorokraik tenke sai servisu,” nia reforsa.
Tuir nia, PNTL mos seidauk iha manajementu ida ne’ebe diak tanba servisu barak mak hala’o hamutuk deit.
“Servisu hahu dala ida, husi administrasaun ba operasaun no operasaun ba administrasaun servisu rua ne’e ami bele halo hotu deit ida ne’e mak oras servisu barak liu iha kantor duke iha uma,”nia preokupa.
Maria hatutan, servisu polisia ne’e lahare ba feto no mane maibe servisu ne’ebe mak igual entre feto ho mane.
Entertantu Agusta Pereira komunidade Bairo Pite, hateten polisia feto sira ne’ebe hetan violensia husi la’en ne’e tanba sira nia la’en seidauk komprende kona-ba sira nia servisu polisia ne’e oinsa.
“Entaun ita feto mak tenke esplika klaru ba sira katak ami nia servisu polisia ne’e dalaruma sai oras hanesan ne’e hodi nune’e sira nia la’en bele komprende se sira laiha esplikasaun klaru entau la’en sira mos labele hatete sira hanoin deit tanba saida mak o mai tarde ida ne’e bele akontese violensia domestika entre fen ho laen,” nia dehan.
TDW koko konfirma ho Sekretaria Estadu, Seketaria Estadu Promosaun Igualdade SEPI, Idelta Rodrigues, kona ba assuntu ne’e maibe nia la iha fatin atu koalia ho media.