- Publika iha: 27 Outubro 2014
Militants Partidus Politiku (Parpol) barak mak laiha konesementu kona ba Orsamentu Subvensaun Publiku (OSP) ne’ebe kada tinan Komisaun Nasional ba Eleisoens aloka ba partidu sira ne’ebe hetan kadeira iha Parlamentu Nasional.
Membru Komisaun Nasional Eleisaun (CNE), Komisaria Joana Dulce Vitor, hateten wainhira ekipa CNE tun ba baze halo monitorizasaun ba ezekusaun osan hirak ne’e, komunidades iha baze sente hakfodak, tanba laiha informasaun ba sira.
“So lolos ho osan sira ne’e, bele fo edukasaun sivika ba sira nia milintantes,” Komisaria Vitor hateten, iha Dili.
Hanesan iha tinan ida ne’e (2014), Komisaria Vitor, hateten kada partidu iha Parlamentu Nasional hahu husi partidu Frente Mudansa hetan $18,615.38, Fretilin $2,307,692,31, no CNRT $2,769,230.77, e osan hirak ne’e atu uja ba atividade partidus nian iha baze.
“Nein partidu ida mak halo sosializasaun kona ba osan subvensaun ne’e ba militants sira,” Komisaria Vitor preokupa.
Entretantu Deputada Albina Marcal husi bankada Congresu Nasional Rekonstrusaun de Timopr (CNRT), rekonese no durante ne’e partidu CNRT rasik seidauk iha programa fo edukasaun sivika ba militante sira iha baze konaba ida ne’e.
“Halo ona acara ruma mak hanesan halo relatoriu deit kona ba acara ne’e gasta ona osan ho montante hira, ne’e deit,” Deputada Marcal hateten.
Nia promote, ba future CNRT sei fo edukasaun sivika ba militantes sira kona ba osan subvensaun publiku ne’e, nune’e bele transparansia liu tan.
Iha lidun seluk Deputadu Aurelio Freitas Ribeiro, hateten atu haforsa tranparansia iha ezekusaun, militantes sira tenke iha konesementu ba osan ne’e.
“Partidu Fretilin durante ne’e la halo, karik ba future presija iha hanoin para atu halo,” Deputadu husi bankada Fretilin ne’e hateten.