- Publika iha: 06 Novembro 2014
Vise Prezidente Parlamentu Nasional (PN), Deputadu Aderito Hugo da Costa, hateten negosiantes so bele fa’an deit sira nia produtu, la’os sai fali uma hodi hela iha merkadu.
“Merkadu ne’e atu fa’an sasan, la’os tranzisaun para sira ba hela iha ne’eba hodi ba eskola no halo servisu seluk,” Vise prezidente PN, Deputadu kritika, iha Parlamentu Nasional.
Nia mos husu ba governu atu iha seriadade ba asuntu ida ne’e, tanba merkadu atu fa’an sasan, la’os fatin ba familia tomak hodi hela.
“Ita haree merkadu antigu Comoro nian ne’e, agora komunidade sira uja sai fali uma, la’os fa’an sasan,” nia kestiona.
Nia dehan, vendedores ne’ebe fa’an sira nia sasan la permanente iha merkadu, la merese hetan fatin iha merkadu.
“Sira tenke konsisten fa’an sira nia produtu iha merkadu, la’os ohin fa’an no aban abandona tiha fatin, vendedores hanesan ne’e la merese atu hetan espasu iha merkadu,” nia dehan.
“Tanba ne’e merkadu publiku, la’os privadu,”
Iha parte seluk Komunidade Comoro, Jeferino da Silva, hateten governu tenke fo sansaun ba ema sira ne’ebe uja merkadu hanesa fali uma.
“Se sira la tuir regras ne’ebe iha, tenke fo sansaun ba sira, moris iha estado demokratiku tenke tuir regras, la’os ema ida-diak halo tuir nia hakarak deit,” nia sujere.
Nia hatutan, kondisaun eis merkadu Comoro oras ne’e dadaun rungu-ranga, tanba numeru komunidade ne’ebe hela aumenta ba beibeik, e pior liu hakiak tan animal iha fatin ne’eba.
Entretantu Xefe Suku Santa Cruz, Manuel Correia, hateten komunidade uja merkadu hanesan uma, tanba falta kontrolu husi governu no husik abandonadu. “Tanba ne’e presiza kria mekanismu ida hodi halo kontrolu,” nia sujere.
Alende ne’e, nia dehan, problema seluk mos tanba to’o agora lei rai nian seidauk iha, entaun susar atu dehan katak ne’e propriedade estadu nian.
“Ita koalia deit ne’e labele, ita tenke hatudu buat ne’ebe realidade atu lei mak proteje ita nia direitu, la’os koalia ba malu deit,” Correia hateten.